Jańbyrdyń sońy qarǵa ulasady.
«Qazgıdromet» mamandary 27-29 qyrkúıek kúnderi aýa raıy qandaı bolatynyn aıtty, dep habarlaıdy Almaty-akshamy.kz.
«Aldaǵy táýlikterde soltústik-batys sıklonnyń sońynan Jańa jer aýdanynan sýyq antısıklon keledi. Respýblıkanyń soltústik, ortalyq jáne shyǵys óńirlerinde jańbyrdyń sońy qarǵa ulasady, kóktaıǵaq, tuman jáne aýa temperatýrasynyń mınýsqa deıin tómendeýi kútiledi. Jeldiń kúsheıýi boljanady, elimizdiń ońtústik-batysynda, ońtústiginde shańdy daýyl kútiledi», - delingen sınoptıkterdiń habarlamasynda.
Boljam boıynsha, Qazaqstannyń soltústik óńirlerinde termometrlerdiń túngi kórsetkishteri 1-6 gradýsqa deıin tómendeıdi, al kúndiz aýa temperatýrasy 1-6 gradýsqa deıin azdap joǵarylaıdy, respýblıkanyń ońtústik jáne batys óńirlerinde kúndiz aýa temperatýrasy15-23 gradýsqa deıin jylynady.