Sporttyq jáne mádenı ómir týraly Óńirlik komýnıkasıalar qyzmetiniń brıfıńinde Almaty qalasy Alataý aýdany ákiminiń orynbasary Ertas Besirov aıtyp berdi, dep habarlaıdy Almaty-akshamy.kz Almaty qalasynyń Óńirlik komýnıkasıalar qyzmetine silteme jasap.
«Aǵymdaǵy jyly "Nurkent" shaǵynaýdanynda ústel tenısi ortalyǵy ashyldy. Ortalyqtyń negizgi zaly - 20, jattyǵý zaly - 8 tenıs ústelimen jabdyqtalǵan. Zalda kórermenderge arnalǵan 328 oryn bar», - dedi E. Besirov.
Aýdanymyzda 2020-2021 jyldary salynǵan fýtbol alańdarynda arnaıy jattyqtyrýshylar tarapynan tegin jattyǵýlar ótkiziledi.
Sonymen qatar, sport jáne mádenıet baǵyttary boıynsha tegin oqytatyn 9 aýla klýbtary jumys isteıdi. Sondaı-aq, Alatau Creative Hub mádenı-bilim berý ortalyǵy balalardy tegin úıirmelerge qabyldaıdy.
«Aǵymdaǵy jyly Alataý aýdany ákiminiń apparatymen aýdan turǵyndary úshin sporttyq jáne shyǵarmashylyq úıirmelerin ashý úshin jer telimimen birge burynǵy mádenıet úıiniń ǵımaratyn satyp alý máselesi qaraldy. Búgingi kúni menshik ıesimen ǵımaratty satyp alý úshin qujattamany resimdeý boıynsha jumystar júrgizilýde. Ǵımaratty satyp alǵannan keıin Almaty qalasynyń tıisti basqarmalarymen birlesip úıirmeler ashý josparlanýda», - dedi E. Besirov.
«Shyńǵa órleý» jáne «Belsendi uzaq ómir» áleýmettik ortalyqtary bazasynda birlesken úıirmeler ashý máselesi qarastyrylýda.
Sondaı-aq, Almaty qalasy qurylys basqarmasynyń tapsyrysy boıynsha "Nurkent" shaǵynaýdanynda mektep jasyna deıingi balalarǵa arnalǵan ınovasıalyq shyǵarmashylyq ortalyǵynyń, jabyq jáne ashyq korttary bar tenıs ortalyǵynyń, "Zerdeli" shaǵynaýdanynda dene shynyqtyrý-saýyqtyrý kesheniniń qurylysy júrgizilýde.