Almaty qalasynyń Alataý aýdany ınjenerlik ınfraqurylymdy salý men jańǵyrtý jaǵynan qarqyndy túrde jańaryp keledi. Sapaly komýnıkasıamen qamtamasyz etý jumystary buryn qalaǵa qosylǵan aýmaqtardy qosa alǵanda, barlyq yqsham aýdandy qamtyp otyr. Bul aýdandarda turǵyndar uzaq jyl boıy ortalyqtandyrylǵan júıeniń bolmaýyna baılanysty septık pen qudyqtardy paıdalanýǵa májbúr bolǵan. Bul týraly Alataý aýdanynyń ákimi Talǵat Malybaev Óńirlik komýnıkasıalar qyzmetinde ótken baspasóz konferensıasynda málimdedi, dep habarlaıdy aqshamnews.kz
2024 jyly Alǵabas jáne Saıaly yqsham aýdandarynda mańyzdy jobalar aıaqtaldy: 48,6 shaqyrym sýmen jabdyqtaý jáne sý burý jelileri, sondaı-aq Ójet yqsham aýdanynda kárizdik sorǵy stansıasy (KNS) salyndy. Jumystardyń jalpy quny — 3,5 mlrd teńge. Osy jobalardyń arqasynda 5 myńnan astam turǵyn alǵash ret ortalyqtandyrylǵan aýyz sý men káriz júıesine qol jetkizdi.
- 2025 jyldyń jeltoqsan aıynda Boraldaı, Aqbulaq, Shapaǵat, Bolashaq jáne Rahat-Mádenıet yqsham aýdandaryndaǵy 23 myń turǵynǵa arnalǵan 270 shaqyrym ınjenerlik jelini salyp bitpek. Sonymen qatar, Aıgerim yqsham aýdanynda jańa kárizdik sorǵy stansıasy paıdalanýǵa beriledi. Bul jobalardyń jalpy quny — 15,5 mlrd teńge.
- Terekti yqsham aýdanyna erekshe kóńil bólingen, munda 2025 jylǵy shildede 10,9 mlrd teńgelik iri ınfraqurylymdyq joba iske asyryla bastaıdy. Bıyldyń ózinde 4 mlrd teńge bólinip, 90 shaqyrym sýmen jabdyqtaý jáne sý burý jelilerin salý josparlanǵan. Bul júıeler 9 myńnan astam turǵyndy sýmen, kárizben qamtamasyz etpek. Jumysty 2026 jyldyń sońyna deıin aıaqtaý kózdelip otyr.
- Bıylǵy tamyz aıynda memlekettik saraptamanyń oń qorytyndysy alynǵannan keıin 13 jáne 14-terrıtorıa, Bolashaq, Qarasý, Aıgerim-1, Aıgerim-2 yqsham aýdandarynda jáne «Ójet» kárizdik sorǵy stansıasynda 60 shaqyrym ınjenerlik jeliniń qurylysy bastalady. 6,6 mlrd teńgege baǵalanǵan bul jobalar 2026 jyldyń qarashasynda aıaqtalady.
2025 jyldyń aqpanynda Shańyraq-1, Shańyraq-2 jáne Qarasý yqsham aýdandarynda 18 kárizdik sorǵy stansıasy salynyp bitti. 2025 jyldyń qyrkúıegine deıin bulardy tolyq qosý josparlanyp otyr. Sonymen qatar, 2025 jyldyń qarashasynda Ójet pen Samǵaý yqsham aýdandarynda 2,1 mlrd teńgege taǵy 5 sorǵy stansıasyn salyp bitpek.
Eń úlken jobanyń biri — «Batys káriz kolektorynyń» qurylysy. Strategıalyq mańyzy bar bul nysannyń qurylys jumystary 2025 jyldyń aqpanynda bastaldy. Uzyndyǵy — 34,9 shaqyrym, ınvestısıa kólemi — 37,2 mlrd teńge. Bul joba Alataý men Naýryzbaı aýdandarynyń 130 myń turǵynyn jáne Almaty oblysyndaǵy İle aýdanynyń Amanat aýylyn ortalyqtandyrylǵan sý burý júıesimen qamtamasyz etedi. Joba aıasynda Alǵabas yqsham aýdanynda kárizdik sorǵy stansıasy da salynady. Barlyq jumystar 2026 jyldyń qarashasyna deıin aıaqtalady.
Sonymen qatar, elektr jelileri de jańartylyp jatyr. 2025 jyly «AJK» AQ Shańyraq-1, Aıgerim-1, Aıgerim-2, Uljan-2, Aqbulaq, Alǵabas, Terekti, Ójet jáne Qarasý yqsham aýdandaryn qamtyǵan 10 yqsham aýdanda kúrdeli jáne aǵymdaǵy jóndeý jumysy júrgiziledi. 170 shaqyrym jeli jańartylyp, taǵy 28,5 shaqyrym jeli kúrdeli jóndeýden ótpek. Sonymen qatar, jyl sońyna deıin Shańyraq, Uljan jáne Ójet aýdandaryn qamtıtyn 8 yqsham aýdanda ıesiz 73,5 shaqyrym jeli qaıta jańartylyp, 33 transformatorlyq qosalqy stansıa ornatylady. Bul jumystarǵa jergilikti búdjetten 2,1 mlrd teńge bólingen.
- Jańa ónerkásiptik jáne saıajaı aımaqtaryn elektrmen jabdyqtaý da nazardan tys qalǵan joq. Bıyl Indýstrıaldyq aımaq pen Teploenergetık, Energetık massıvterinde 9,3 shaqyrym jańa jeli salynyp, oǵan 325 mln teńge bólindi.
- 2025 jyldyń mamyrynan bastap Alataý aýdanyndaǵy 255 kóshe men qoǵamdyq keńistikterde 2 900 baǵana men 3 500 sham ornatýdy kózdeıtin aýqymdy joba bastaldy. Jobanyń jalpy quny — 2,6 mlrd teńge.
Osylaısha, Alataý aýdany Almaty qalasyndaǵy eń qarqyndy damyp kele jatqan aýdannyń birine aınalyp otyr. Munda salynǵan árbir teńge ondaǵan myń turǵynnyń ómir sapasyn arttyrýǵa baǵyttalǵan.