Almaty qalasynyń Alataý aýdanynda jyl sońyna deıin 31 qoǵamdyq keńistik, 16 aýla jáne Qarasý kóli abattandyrylady
Alataý aýdanynda turǵyndar úshin jaıly qalalyq orta qurý jumystary qarqyndy júrgizilýde. Bul týraly aýdan ákimi Talǵat Malybaev Almaty qalasy óńirlik komýnıkasıalar qyzmetinde ótken baspasóz konferensıasynda málimdedi. Onyń aıtýynsha, qoǵamdyq keńistikterdi abattandyrý men damytý – aýdannyń basym baǵytynyń biri, dep habarlaıdy aqshamnews.kz
Ótken jyly Qarasý shaǵynaýdanynda 10 gektardan astam aýmaqta skver men jaıaý júrginshiler aımaǵy abattandyryldy. Onda shaǵyn arhıtektýralyq formalar, jańa kóshe jıhazdary, demalýǵa arnalǵan oryndar ornatylyp, jaryqtandyrý jáne kógaldandyrý júrgizildi. Jobanyń jalpy quny 760 mln teńgeni qurady. Mysaly, «Daraboz» shaǵynaýdanynda meshit mańynda 6,2 ga aýmaqty qamtıtyn saıabaq salyndy. 2024 jyldyń qyrkúıeginde Boraldaı ózeniniń 24 gektarlyq jaǵalaýyn abattandyrý jumystary aıaqtaldy. 2025 jyldyń qyrkúıeginde Ójet shaǵynaýdanyndaǵy (16 ga) toǵandy kógaldandyrý, sport jáne balalar alańymen qamtý jobasy aıaqtalmaq. Budan bólek, 2023 jyly jóndeý aıasynda 6 qoǵamdyq keńistik abattandyrylyp, 2 avtomatty sýarý júıesi ornatylǵan.. Jobanyń jalpy quny – 2,6 mlrd teńge.
«Halyq qatysatyn búdjet» baǵdarlamasy aıasynda 2024 jyly 2,5 mlrd teńgege 45 joba júzege asyryldy: 24 qoǵamdyq keńistik, 10 aýla, 5 jaryqtandyrý jobasy jáne 2 jer ýchaskesine avtosýarý júıesi ornatyldy. Bıyl taǵy 2,5 mlrd teńge bólinip, turǵyndar usynǵan 570 usynystyń ishinen iriktelgen 50 jobany iske asyrý josparlanǵan.
2025 jyldyń naýryzynan qyrkúıegine deıin 31 qoǵamdyq keńistik, 16 aýla aýmaǵy, 3 kóshe jaryǵyn jańartý jobasy júzege asyrylady. Sonymen qatar, maýsym-qyrkúıek aralyǵynda 12 gektardy qamtıtyn Qarasý kóli men Momyshuly kóshesi boıyndaǵy jaıaý júrginshiler aımaǵyn abattandyrý jumystary júrgizilip jatyr.
2025 jyly Rysqulov dańǵyly men Saǵı Ashımov kóshesi qıylysynda jańa skver, sondaı-aq Raıymbek pen Rysqulov dańǵyldarynyń arasyndaǵy Úlken Almaty arnasy boıynda jasyl aımaqtyń qurylysy bastalady. Qurylys-montaj jumystary shildede bastalyp, jyl sońyna deıin aıaqtalady.
«Maqsat – tek aýmaqty jańartý emes, adamdar qaıta-qaıta kelgisi keletin, barlyq býyn ókilderine jaıly bolatyn keńistikter qurý», – dep atap ótti Alataý aýdanynyń ákimi Talǵat Malybaev.