Alataý aýdanynda kópbalaly otbasylardan bastap, zeınetkerler men erekshe qajettilikteri bar azamattarǵa deıingi túrli sanattaǵy turǵyndardy qamtıtyn keshendi áleýmettik qoldaý baǵdarlamasy júzege asyrylyp jatyr. Bul týraly Almaty qalasy Alataý aýdanynyń ákimi Talǵat Malybaev Óńirlik komýnıkasıalar qyzmetinde ótken baspasóz máslıhatynda aıtty, dep habarlaıdy aqshamnews.kz
Ákimniń aıtýynsha, aýdannyń Jumyspen qamtý jáne áleýmettik baǵdarlamalar bólimi arqyly ómir súrý sapasyn arttyrý men qıyn jaǵdaıda qoldaý kórsetýge baǵyttalǵan 13 memlekettik qyzmet kórsetiledi. Olardyń qataryna turǵyn úı kómegi, saýyqtyrý men ońaltý tólemderi, sondaı-aq komýnaldyq tarıfterdiń ósýine baılanysty beriletin ótemaqylar kiredi.
Bıyl:
• 93 otbasyǵa jalpy 3,3 mln teńge kóleminde turǵyn úı kómegi kórsetilgen;
• 461 otbasy 157,1 mln teńge kóleminde ataýly áleýmettik kómek alǵan;
• 651 zeınetker jalpy somasy 17,9 mln teńge bolatyn áleýmettik kómekke ıe bolǵan.
Qart adamdar men múgedektigi bar azamattardyń densaýlyǵy men ál-aýqatyna erekshe kóńil bólinip otyr. Bıyl 350 zeınetker men 592 múgedek azamatty kýrorttyq emdeýge jiberý josparlanǵan. Bul maqsatqa 323 mln teńge bólingen.
Sondaı-aq, tótenshe jaǵdaıdan zardap shekken bir turǵynǵa 786 myń teńge kóleminde bir rettik kómek kórsetilgen.
Komýnaldyq tarıfterdiń ósýine baılanysty ótemaqy tóleý de mańyzdy baǵyttardyń biri. Bul kómekti 15 589 adam alǵan. Jalpy 152 mln teńge bólingen.
Ardagerler de nazardan tys qalǵan joq:
• Aqpan aıynda 464 aýǵan soǵysy ardagerine 46 mln teńge;
• 9 mamyr kúni 895 ardagerge 94,3 mln teńge kóleminde qoldaý kórsetildi.
Erekshe qajettilikteri bar adamdardy qoldaý baǵytynda da aýqymdy jumys júrgizilip jatyr:
• 127 adamǵa jalpy 26 mln teńgege qolarbalar berildi;
• 394 adam 49 mln teńge kóleminde protezdik kómek aldy;
• 2 522 adamǵa tegin gıgıenalyq quraldar taratylyp, oǵan 490 mln teńge jumsaldy;
• 334 adam tehnıkalyq ońaltý quraldarymen qamtamasyz etilip, bul baǵytqa 56,6 mln teńge bólindi.
Buǵan qosa, múmkindigi shekteýli azamattarǵa kómektesetin 1 000 jeke kómekshiniń eńbekaqysyna aýdan búdjetinen 500 mln teńge bólingen.
Osylaısha, Alataý aýdany óz turǵyndaryna naqty qamqorlyq kórsetip, áleýmettik qoldaýdy júıeli túrde júzege asyryp otyr.