Almaty-akshamy.kz saıtynyń búgingi jańalyqtaryna sholý – kún kerýeni
Alǵys aıtý kúnindegi alǵys
Qazaqstandy kórkeıtýge óz úlesin qosyp júrgen azamattarǵa memleket basshysy alǵys aıtty.
Búgin – elimizde Alǵys aıtý kúni.
Memleket basshysy Qasym-Jomart Toqaev Qazaqstan halqyn Alǵys aıtý kúnimen quttyqtady.
«Bul – bereke-birligimizdi bekemdeı túsetin mereke. Osy kúni elimizdiń azamattary bir-birine erekshe iltıpat kórsetip, rızashylyǵyn bildiredi. Sondaı-aq tatýlyq, yntymaq, dostyq syndy qasterli qundylyqtar jan-jaqty dáripteledi. Munyń bári ultty uıystyrýdyń utymdy joly ekeni sózsiz», dedi Qasym-Jomart Toqaev.
Memlekettik kúzetke kim jaramdy?
2024 jylǵy 1 naýryz ben 5 sáýir aralyǵynda QR MKQ ókilderi barlyq oblys ortalyqtary men respýblıkalyq mańyzy bar qalalarda úmitkerlerdi tańdaý jáne zerdeleý júrgizedi.
Úmitkerlerge mynadaı talaptar qoıylady: jasy 18-27 arasynda, boıy 180 sm-den tómen emes jáne 195 sm-den joǵary emes, bilimi orta bilimnen tómen emes, densaýlyǵy jaqsy. Joǵary bilimdi, sporttyq jetistikteri men razrády bar shaqyrylýshylarǵa basymdyq beriledi.
Toqaev Bektenovti qabyldady
Memleket basshysy Premer-Mınıstr Oljas Bektenovti qabyldady. Premer-Mınıstr elimizdiń qazirgi áleýmettik-ekonomıkalyq jaǵdaıy jáne ekonomıkanyń ósimin qamtamasyz etý jospary týraly baıandady.
Qasym-Jomart Toqaev elimizdi áleýmettik-ekonomıkalyq turǵydan odan ári damytý jóninde birqatar tapsyrma berdi.
Aspanda adasqan
FlyArystan ushaǵy basqa ushaqpen soqtyǵysa jazdady.
Almatyǵa bet alǵan FlyArystan ushaǵy Mýmbaı áýejaıynyń ushý-qoný jolaǵynda Air India áýe kompanıasynyń Airbus A319 ushaǵymen soqtyǵysyp qala jazdady. Buqaralyq aqparat quraldarynyń jazýynsha, qazaqstandyq ushaq ushý-qoný jolaǵyna kezekte turýy kerek bolatyn. Alaıda pılot ushý jolaǵyn shatastyryp alǵan. Bul ýaqytta Air India áýe kompanıasynyń ushaǵy jyldamdyq ala bastaǵan. Alaıda pılot FlyArystan bortynyń qozǵalysyn baıqap, jyldamdyǵyn kúrt báseńdetip, kókke kóterilmeı, soqqtyǵystyń aldyn alǵan. Úndistan avıasıasy oqıǵany tergeýdi bastady.
5 mıllıard dollarlyq aıyppul
Ekologıaǵa keltirgen zalaly úshin NKOK kompanıasyna salynǵan. Ony zańsyz dep, sotqa shaǵynyp júrgenge úkim shyqty. Endi kompanıa 5 mıllıard dollar aıyppuldy tóleýge májbúr. Biraq NKOK buǵan deıin halyqaralyq arbıtraj sotyna júginemiz degen aqparat taratqan bolatyn. Astanada apelásıalyq sot alqasy Atyraý oblystyq ekologıa departamenti qyzmetkerleriniń Qashaǵanda júrgizgen tekseris nátıjesin zańdy dep tanydy.
540 mln teńgeniń esirtkisi
UQK Astana qalasy boıynsha departamenti astanalyq prokýratýranyń úılestirýimen qalanyń ónerkásip aımaǵynda ornalasqan sıntetıkalyq esirtki óndirý boıynsha jasyryn zerthananyń jolyn kesti. Aınalymnan alynǵan esirtki quny «qara naryqta» 540 mln teńgege baǵalandy.
Prezıdent Májilis tóraǵasyn qabyldady
Májilis sońǵy eki aıda 18 zań qabyldap, Senattyń qaraýyna jibergen. Otbasylyq-turmystyq zorlyq-zombylyqqa qarsy is-qımyl, sıfrlandyrý, ǵylym, bıznes júrgizý, medısına qyzmetkerleriniń jaýapkershiligin saqtandyrý, transferttik baǵa belgileý, halyqtyń kóshi-qon máseleleri sekildi quqyqtyq normalarǵa túzetýler engizilgen.
«Jer amanaty» jobasy aıasynda eki jyl ishinde 10 mıllıon gektardan astam jer memleketke qaıtarylǵan. Qańtar-aqpan aılarynda «Qaryzsyz qoǵam» jobasy boıynsha 15 myń adam qarjylyq saýattylyqty arttyrý kýrsynan ótken. Jyl sońyna deıin taǵy da 750 myń azamatty oqytý josparlanyp otyr.
10 myń bankrot
Bankrot dep tanylǵan 10 myńǵa jýyq qazaqstandyq endi bes jylǵa deıin bankten kredıt ala almaıdy. Qazaqstanda 10 myńǵa jýyq azamattyń kredıti keshirildi, osy maqsatqa shamamen 20 mıllıard teńgedeı qarjy jumsaldy. Ol azamattyń qarjy ahýalyna úsh jyl boıy baqylaý júrgiziledi. Jeti jyl ishinde ózin qaıtadan bankrot dep jarıalaı almaıdy.