Alataý aýdanynda densaýlyq saqtaý ınfraqurylymyn damytý men halyqtyń áleýmettik osal toptaryn keshendi qoldaý negizgi baǵyttyń birine aınaldy. Aýdan ákimdigi jańa medısınalyq nysandar ǵana salyp qoımaı, otbasylardy, qarttardy, múmkindigi shekteýli azamattardy qoldaıtyn áleýmettik bastamalardy júzege asyrýǵa da erekshe kóńil bólip otyr. Bul týraly aýdan ákimi Talǵat Malybaev Óńirlik komýnıkasıalar qyzmetinde ótken baspasóz konferensıasynda málimdedi, dep habarlaıdy aqshamnews.kz
2024 jyldyń jeltoqsanynda Qarasý shaǵynaýdanynda bir aýysymda 200 adam qabyldaı alatyn alǵashqy medısınalyq-sanıtarlyq kómek ortalyǵynyń qurylysy aıaqtaldy. Bul nysan shalǵaıda ornalasqan turǵyndarǵa qolaıly boldy. Tamyz aıynda Saıaly shaǵynaýdanynda dál osyndaı taǵy bir ortalyqty salyp bitpek. Táýligine 200 adam qabyldaıtyn jańa nysannyń qurylysyna 2,1 mıllıard teńge bólinipti.
Medısınalyq ınfraqurylymdy damytýmen qatar, aýdanda memlekettik áleýmettik tapsyrys aıasynda áleýmettik jobalar da qarjylandyrylyp jatyr. «Baqytty otbasy» otbasyn qoldaý ortalyǵy kóp balaly jáne az qamtylǵan áıelderge aqparattyq kómek kórsetip, otbasy ál-aýqatyn nyǵaıtýǵa baǵyttalǵan trenıńter men kýrstar ótkizedi. Belsendi uzaq ómir súrý ortalyǵy qart adamdardyń ómir sapasyn arttyrýǵa baǵyttalǵan.
«Shyńǵa órleý» áleýmettik klýby egde jastaǵy turǵyndardy qoǵamdyq ómirge aralastyrýǵa kómektesip, olardyń kórgen-túıgenin kóp balaly jáne az qamtylǵan otbasylardan shyqqan bastaýysh synyp oqýshylaryna jetkizýdi josparlaǵan. «Ten Qogam» ortalyǵy múmkindigi shekteýli adamdarmen jumys istep, olardyń ómir sapasyn jaqsartýǵa jáne kásibı áleýetin ashýǵa járdemdesedi. Taǵy bir joba — dástúrli qolónerdi damytý ortalyǵy — áleýmettik osal toptaǵy áıelderge qolónerdi úıretýge kiristi.