Búgin Almaty jurtshylyǵy belgili ádebıettanýshy, fólklortanýshy ǵalym, QR Memlekettik syılyǵynyń laýreaty, Ulttyq Ǵylym akademıasynyń akademıgi, fılologıa ǵylymdarynyń doktory Seıit Qasqabasovty aqtyq saparǵa shyǵaryp saldy.
Seıit Qasqabasov sanaly ǵumyryn ulttyq ádebıetti zerttep, ǵylymnyń damýyna úles qosyp, júzdegen shákirt tárbıelegen akademık, qazaq ádebıeti men fólklortaný ǵylymynda tereń iz qaldyrǵan biregeı ǵalym.
Seıit Asqaruly Qasqabasov 1940 jyly 24 maýsym kúni Semeı qalasynda dúnıege kelgen.
1964 jyly Abaı atyndaǵy Qazaq pedagogıka ınstıtýtyn úzdik tamamdaǵan.
QR Mınıstrler Kabıneti janyndaǵy Joǵary attestasıa komısıasynyń tóraǵasy, L.N.Gýmılev atyndaǵy Eýrazıa ulttyq ýnıversıteti shyǵystaný fakúltetiniń dekany, Qazaqstan Respýblıkasy Ulttyq Ǵylym Akademıasy Ádebıet jáne óner ınstıtýtynyń dırektory qyzmetterin atqarǵan.
Tanymal eńbekteriniń qatarynda "Kazahskaıa volshebnaıa skazka" (1972), "Qazaqtyń halyq prozasy" (1984), "Rodnıkı ıskýsstva" (1986), "Kolybel ıskýsstva" (1990), "Kazahskaıa neskazochnaıa proza" (1992),"Abaı jáne fólklor" (1995), "Zolotaıa jıla" (2000), "Janazyq" (2002), "Qozy Kórpesh-Baıan Sulý. Qyz Jibek. Qazaqtyń ǵashyqtyq jyrlary" (2003), "XV-XVIII ǵasyrlardaǵy qazaq ádebıeti" (2005), "O fólklore ı ne tolko" (2005) "Elzerde" (2008) sıaqty monografıalar men zertteýler kitabynyń jáne 300-den asa eńbektiń, sonyń ishinde fólklor, ádebıet pen óner boıynsha 9 monografıanyń avtory.
Seıit Qasqabasov Qazaqstan Respýblıkasy Memlekettik syılyǵynyń, Sh.Ýálıhanov atyndaǵy syılyqtyń, Jambyl atyndaǵy syılyqtyń, Mahambet atyndaǵy syılyqtyń laýreaty ataǵyna ıe bolǵan. M.Sholohov jáne Uly Petr atyndaǵy reseılik medaldarmen marapattalǵan. 2011 jyly TMD jalpy ǵylym jáne bilim keńistigin damytýǵa járdemdesetin ǵylym jáne bilim salasyndaǵy zor úlesi úshin memleketaralyq "Dostastyq Juldyzdary" syılyǵymen marapattaldy.