Almaty qalasynda «Giovani Talenti kameralyq orkestriniń repertýaryndaǵy qazaqstandyq kompozıtorlardyń shyǵarmalary» atty jınaqtyń tusaýkeseri ótti.
Bul jınaq respýblıkalyq «Táýelsizdik urpaqtary» granty aıasynda basylyp shyqty. İs-shara Qazaqstandaǵy akademıalyq mýzyka mádenıetiniń negizin qalaýshy Ahmet Jubanovtyń týǵan kúnine oraı uıymdastyryldy, dep habarlaıdy aqshamnews.kz.
Jobanyń avtory – halyqaralyq baıqaýlardyń laýreaty Arshat Shárip. 2024 jyly ol «Mádenıet» baǵyty boıynsha «Táýelsizdik urpaqtary» memlekettik grantynyń jeńimpazy atandy.
Jınaqta qazirgi qazaqstandyq avtorlardyń kameralyq orkestrge laıyqtalǵan shyǵarmalary bar. Bul kitaptyń maqsaty – jas oryndaýshylar úshin ulttyq repertýardaǵy shyǵarmalardyń qoryn kóbeıtip, jınaqtaý. Shyǵarmalardy Giovani Talenti kameralyq orkestri oryndaǵan. Orkestr quramynda Ahmet Jubanov atyndaǵy Respýblıkalyq mamandandyrylǵan mýzykalyq mektep-ınternatynyń 25 jas mýzykanty bar.
«Táýelsizdik urpaqtary» granty daryndy jastardy memlekettik qoldaý maqsatynda, Prezıdent Qasym-Jomart Toqaevtyń bastamasymen 2021 jyldan beri tabystalyp keledi.