Memleket jáne qoǵam qaıratkeri Ózbekáli Jánibekovtiń týǵanyna - 90 jyl
Qalamyzda kórnekti memleket jáne qoǵam qaıratkeri, belgili ǵalym Ózbekáli Jánibekovtiń týǵanyna 90 jyl tolýyna oraı respýblıkalyq ǵylymı-praktıkalyq konferensıa ótti, dep habarlaıdy almaty-akshamy.kz.
Ǵylymı konferensıaǵa O. Súleımenov, M. Joldasbekov, M. Jurynov, S. Tereshenko, Q. Sultanov syndy belgili qoǵam qaıratkerleri qatysyp, aıtýly tulǵanyń eńbegi týraly estelikterimen bólisti.
«Ózbekáli Jánibekovtiń jasaǵan jumystaryn biz endi túsinip jatyrmyz. Onyń tikeleı aralasýymen Alash arystary aqtalǵan edi. Bul is boıynsha ol tynymsyz eńbek etti. Sonyń arqasynda Shákárim, Maǵjan Jumabaev jáne t.b. esimderi elmen qaıta qaýyshty. Mundaı basshylar bizge kerek edi, búgin de kerek jáne árqashan qajet bolady. Sondyqtan da biz Ózbekáli Jánibekovti osy tıptegi basshy retinde únemi eske alamyz, dedi, - óz sózinde Qazaqstannyń Eńbek Eri Oljas Súleımenov.
Myrzataı Joldasbekov Ózbekáli Jánibekovpen birge jumys istegen kezderin eske alyp, estelikterimen bólisti.
«Meni qasynan qaldyrmaıtyn, el aralap birge júrdik. Qazaqtyń oı-sanasy týraly aıtqandy jaqsy kóretin. Sóılep ketse, keýdesi keńsaraı edi. Ózi tarıhshy, etnograf boldy. Birtalaı kitaptar jazdy. Jany taza adam edi. Memleket múlkine esh qol suqpaǵan adam», - dedi ol.
Senat depýtaty Altynbek Nuhuly Arystan bab qoryq mýzeıi mańyndaǵy jabylyp qalǵan Ózbekáli Jánibekov mýzeıi tarıhı-etnologıalyq sıpatta qatarǵa qaıta qosý, Túrkistan qalasynda keń kóshege esimin berip, eskertkishin ornatý, 5 tomdyq shyǵarmalar jınaǵyn tolyqtyryp jaryqqa shyǵarý jáne ómirinen derekti kıno týyndylar jasaý, ózi oqyǵan Abaı atyndaǵy Qazaq ulttyq pedagogıkalyq ýnıversıtetinde Ózbekáli Jánibekov atyndaǵy aýdıtorıany ashý, sondaı-aq halyqaralyq ǵylymı-praktıkalyq konferensıa ótkizý týraly usynystaryn jetkizdi.
Jıyn barysynda Qanysh Sátbaevtyń memorıaldyq murajaıy tarapynan QR Memlekettik muraǵatynan alynǵan qujattar men fotosýretter qoıylǵan Ózbekáli Jánibekovtiń ómiri men qaıratkerlik qyzmetine qatysty kórme uıymdastyryldy. Olardyń qatarynda Búkilálemdik IýNESKO tizimine engen mádenı mura qujattarynyń kóshirmesi bar.