QR UQK Almaty qalasy boıynsha departamentinde general-maıor, Ulttyq qaýipsizdik komıtetiniń ardageri Erkin Mýsabaevtyń «Památ, govorı...» atty kitabynyń tusaýkeseri boldy.
Kitapta general-maıordyń ómiri jáne qyzmet jolynda bastan keshken oqıǵalary baıandalǵan. Erkin Mýsabaev elimizdiń qaýipsizdigin qamtamasyz etý isine súbeli úles qosqan jan. Qatardaǵy jedel ýákilden bastap, arnaýly qyzmettiń barlyq satysynan ótip, bárin abyroımen atqarǵan. Ulttyq qaýipsizdikti qamtamasyz etý atty qasterli iske eńbegi sińgen qurmetti ardager.
«Bizdiń ákemiz zeınet jasyna shyǵar aldynda QR UQK Almaty qalasy boıynsha departamentinde jumys atqardy. Onyń ómiri óte erekshe bolatyn, anam ekeýi kóptegen qalada birge qyzmet atqardy. Ákem jastaıynan tyńbaı eńbek etti. KSRO MQK-niń ortalyq apparatynda bólim bastyǵynyń orynbasary, óndiristik qarsy barlaý basqarmasynyń partıa uıymynyń hatshysy boldy. Qyzmet jolynda elimizdiń ár aımaǵynda basshy bolyp jumys istedi. Biz ákemizdi maqtan etemiz. Bul kitapta ákemniń bala kezinen, eseıgen, es kirgen sátine deıingi kezeńderi jazylǵan. Sondaı-aq, ózimen birge jumys istegen qyzmettesteri jaıly baıandalady», – deıdi qyzy Raýshan Musabaeva.
Al Ulttyq qaýipsizdik komıtetiniń ardageri, general-maıor Mahambet Mýstafa: «Biz Erkinmen uzaq jyldar boıy dos boldyq. Kitapty jazar aldynda «munyń paıdasy bireýge tıe me, jastarymyz osy kitapty oqyǵanda rýhtanyp, jigerlene ala ma?» dep kóp oılandyq. Aqyry, oqyrmandardyń júregine jetetindeı jazýǵa tyrystyq. Erkinniń eńbek joly óte qyzyq. Onyń otbasyndaǵy 4 qyzy ár óńirde qyzmette júrgende dúnıege keldi. Qasyndaǵy jary oǵan senim bildirip, únemi qoldaý kórsetti. Erkin óte eńbekqor, adal, júregi keń adam. Ózin bastyqpyn dep menmensigenin esh ýaqytta kórmedim. Onyń ómir joly jastarǵa úlgi-ónege ekenine senimdimin», – deıdi.