Qazaqstannyń Oqý-aǵartý mınıstrligine qarasty Balalardyń quqyqtaryn qorǵaý komıteti mektep oqýshylaryna baǵyttalǵan jańa alaıaqtyq áreketter týraly eskertti, dep habarlaıdy Aqshamnews.kz tilshisi.
Komıtettiń málimetinshe, jańa oqý jyly bastalǵaly beri belgisiz adamdar balalarǵa qońyraý shalyp, ózderin muǵalim retinde tanystyryp, túrli syltaýmen SMS arqyly kelgen qupıa kodtardy suraǵan.
"Olar "elektron kúndelikti qaıta shyǵarý qajet" degen jeleýmen SMS kodtaryn aldap surap alady. Balalar bul áreketti ata-anasyna nemese mektepke kómektesý dep oılap, shyn máninde alaıaqtarǵa memlekettik qyzmetterge, onlaın-bankıngke nemese týystarynyń bank shottaryna kirýge múmkindik berip otyr", - delingen komıtet taratqan habarlamada.
Mınıstrlik SMS arqyly keletin kodtar - tek jeke aqparat ekenin eskertip, olardy eshkimge, tipti muǵalimmin degen adamǵa da aıtýǵa bolmaıtynyn qatań eskertedi.
Balalarǵa myna dúnıelerdi eskertý kerek:
-
eshqandaı jaǵdaıda SMS-kodtardy eshkimge bermeý;
-
kúmán týsa, birden ata-anasyna habarlasyp naqtylaý;
-
kúmándi siltemelerge ótpeý jáne beıtanys qosymshalardy júktemeý.
Ata-analarǵa keńes:
-
muǵalimder men mektep qyzmetkerleri eshqashan SMS-kodtar nemese bank kartasynyń derekterin suramaıtynyn balaǵa túsindirý;
-
telefonǵa ata-analyq baqylaý ornatyp, beıtanys nómirlerden kelgen qońyraýlardy qadaǵalaý;
-
balańyzben senimdi qarym-qatynas ornatyp, ol mundaı jaǵdaılardan qoryqpaı habarlaı alatyndaı etý.
Kúmándi áreketter baıqalsa, polısıaǵa nemese 111 baılanys ortalyǵyna habarlasý qajet.