Almaty ákimi qaladaǵy sý basý qaýpi bar aýmaqtardy tekserip, jumys merzimi men sapasyna qatysty tapsyrma berdi, dep habarlaıdy Aqshamnews.kz tilshisi.
Almaty ákimi Darhan Satybaldy jumys sapary barysynda qaladaǵy sý basý qaýpi bar aýmaqtardy aralap, turǵyndarǵa yńǵaısyzdyq týdyryp otyrǵan jaǵdaımen tanysty. Sapar qorytyndysy boıynsha jobalaý jáne qurylys-montaj jumystaryn jedeldetý jóninde tapsyrma berildi.
Sapar Bostandyq aýdanynan bastaldy. Munda Jáńgir han kóshesinde nóser jaýynnan keıin únemi 1,2 metrge deıin sý jınalady. Ákimniń aıtýynsha, bul eńiste ornalasqan jer, buryn ózen arnasy bolǵan. Mamandardyń aıtýynsha, máseleniń sheshimi saǵatyna 400 tekshe metr sý aıdaıtyn káriz sorǵy stansıasyn salý.
Budan keıin qala basshysy ál-Farabı dańǵyly boıyndaǵy jaǵdaıdy kórdi. Byltyrǵy nóser jaýyn bul aımaqta da úlken zardap ákelgen edi. Qazir bul baǵytta joba daıyndalyp, memlekettik saraptamadan ótken. Onda Qapparov kóshesinde aryq júıesin salý, al Úshkempirov kóshesinde eki iri sý qabyldaǵysh ornatý qarastyrylǵan. Darhan Satybaldy jobalaýshylardyń qabyldaıtyn sheshimderiniń sapasyna jaýap beretinin jáne qatelikke jol berilmeıtinin qadap aıtty.
Qabanbaı batyr kóshesinde de sý burý júıesiniń olqylyǵy anyqtaldy. Aryq ótkeli opyrylyp, jaýyn kezinde sý tasyp, jolǵa shyǵyp ketedi. Ákim munda úlken dıametrli temirbeton qubyrlaryn ornatyp, jumysty sozbalańǵa salmaı bitirýdi tapsyrdy.
Medeý aýdanynda Darhan Satybaldy Shyǵys aınalma joly – Halıýllın – Taırov – Shaqshaq Jánibek kósheleriniń aýmaǵyndaǵy sý qubyry jáne káriz júıesin salýmen tanysty. Munda merdiger uıym jolǵa túsetin salmaqty azaıtý úshin jerdi tesý ádisin qoldanyp jatyr. Qala basshysy negizgi jumystardy túnde – kólik qozǵalysy azaıǵan kezde isteýdi tapsyrdy.
Sapardyń sońynda ákim kólik júıesin damytýda júıeli kózqarastyń qajettigin jetkizdi. Onyń aıtýynsha, aldaǵy ýaqytta qalanyń joǵarǵy bóliginen ál-Farabı dańǵylyna shyǵatyn radıaldy joldardy keńeıtý múmkindigi qaralady. «Tehnıkalyq múmkindik bar jerde joldy eki jolaqtan tórt jolaqqa deıin keńeıtip, ortalyq kóshelerdiń júktemesin azaıtamyz», – dedi ákim.
Qorytyndylaı kele, Darhan Satybaldy qaýipti aýmaqtarda jobalaý qujattaryn jedel daıyndap, sý burý júıesin sapaly jańǵyrtýdy, merzimniń qatań saqtalýyn jáne jumys barysynda qala turǵyndaryna múmkindiginshe qolaısyzdyq týǵyzbaýdy tapsyrdy.