Olar balalardyń ańqaýlyǵyn paıdalanyp, ártúrli oqıǵalar oılap taýyp, túrli aılalaryn iske asyrýǵa talpynady.
Qarjy alaıaqtary balalar arqyly olardyń ata-analarynyń aqshasyna qol jetkizýge tyrysady, dep habarlaıdy aqshamnews.kz
QR Qarjy naryǵyn retteý jáne damytý agenttigi alaıaqtar balalardy olardyń ata-analarynyń qarjylyq qarajatyna qol jetkizý úshin qalaı aldaıtynyn jáne alaıaqtyqtan qalaı qorǵanýǵa bolatynyn usyndy.
Bala elektrondyq poshta, áleýmettik jeli, SMS nemese messendjer arqyly aqshalaı syılyq nemese shetelge joldama utqany, ony aqshaǵa aıyrbastaýǵa bolatyny týraly habarlama alady. Sondaı-aq, shetelde turatyn baı týysynyń murageri bolǵandyǵy týraly da hat kelýi múmkin.
Bul rette aqshany nemese joldamany alý úshin bala óz kelisimin berip, silteme boıynsha ótip, tirkelýi kerek. Saýalnamada jeke derekterdi, onyń ishinde kez kelgen qolda bar tólem kartasynyń nómirin, onyń qoldanys merzimin jáne artqy jaǵyndaǵy úsh tańbaly kodty kórsetý talap etiledi. Eger balalar qaskúnemderge osy derbes jáne tólem derekterin berse, alaıaqtar ata-anasynyń aqshasyna qol jetkize alady.
Balańyzdyń tanysynyń paraqshasynda qoldaý kórsetýdi jáne múmkindiginshe banktik shotqa nemese elektrondyq ámıanǵa aqsha jiberýdi suraıtyn habarlama jarıalanady. Osy syndy taǵy bir sqema – balańyzdyń synyptasy oǵan messendjer arqyly habarlasyp, jaqyn adamynyń apatqa ushyraǵanyn nemese óziniń syrqattanyp qalǵanyn aıtyp nemese jaı ǵana qaryzǵa aqsha suraýy múmkin. Biraq ol bul týraly eshkimge aıtpaýdy suraıdy. Eger sizdiń balańyz alaıaqtardyń ótinishin oryndap, óz erkimen jasyryn túrde aqsha aýdarsa, ony qaıtarý múmkin emes. Sondyqtan mundaı jaıttar týraly oǵan aldyn ala eskertken abzal.
Alaıaqtar balańyzdyń gadjetine jyldam baıýǵa nemese kez kelgen adamnyń ornalasqan jerin baqylaýǵa múmkindik beretin qosymshanyń jarnamasy bar silteme jiberýi múmkin. Eń bastysy, bul mobıldik qosymsha biregeı bolyp tabylady jáne ony silteme arqyly tegin júktep alýǵa bolady.
Bala kúmándi baǵdarlamalyq jasaqtamany júktese, bul jeke aqparatty úshinshi tulǵalarǵa bere alatyn, balańyzdyń júrgen jerin qadaǵalaıtyn jáne telefondaǵy basqa qosymshalardy basqara alatyn shpıondyq baǵdarlama ekenin birden túsinbeýi de múmkin.
Ata-analar balalaryn alaıaqtardan qalaı qorǵaı alady?
Balańyzǵa beıtanys adamdarǵa ózderi jáne jaqyndary týraly aqparatty berýge bolmaıtynyn aıtyńyz. Alaıaqtar zamanaýı tehnologıalardyń kómegimen kez-kelgen adamdy aldaı alatynyn túsindirińiz.
Balalaryńyz qandaı jaǵdaı bolmasyn barlyǵyn ashyq aıtýǵa bolatyny jáne sizdiń oǵan uryspaıtynyńyz týraly bilýi mańyzdy. Balańyzben qarym-qatynasyńyz ózara senimge negizdelýi kerek.
Eger bala qandaı da bir sebeptermen úıde jalǵyz qalsa, onda ol ata-anasynyń, basqa týystarynyń, kórshileriniń, "102" qyzmetiniń, sondaı-aq ýchaskelik ınspektordyń jumys jáne uıaly telefondaryn bilýi qajet.