«Agrarlyq kredıttik korporasıa» AQ-ǵa qazaqstandyqtardan kásipkerlik bastamalardy iske asyrý úshin jastarǵa beriletin jyldyq 2,5%-ben jeńildikti mıkrokredıtter alýǵa 761 ótinim tústi, dep habarlaıdy Almaty-akshamy.kz turkystan.kz-ke silteme jasap.
2023 jyl ishinde barlyǵy 5 796 mıkrokredıt berý josparlanýda.
Mıkrokredıtter 21 jastan 35 jasqa deıingi jastarǵa óz isin ashý nemese keńeıtý úshin beriledi. Ol úshin 5 jyldan aspaıtyn merzimmen jeke kásipker retinde tirkelý qajet. Bul rette qatysýshylardyń «Agrarlyq kredıttik korporasıa» AQ-ǵa ótinimmen júgingen ýaqyttaǵy jasy eskeriledi.
«Mıkrokredıttiń mólsheri 5 mln teńgege deıin, al qatysýdyń eń uzaq merzimi 5 jyldan (kez kelgen maqsatqa), 7 jylǵa deıin (mal sharýashylyǵy salasyndaǵy jobalar úshin) bolýy múmkin», – delingen habarlamada.
Nomınaldy syıaqy mólsherlemesi jyldyq 2,5%-dan aspaıdy.
«Mıkrokredıt alýshylar úshin negizgi borysh pen syıaqyny óteý boıynsha jeńildikti kezeń beriledi. Ol mıkrokredıt merzimi uzaqtyǵynyń úshten birinen aspaıdy. Kepilmen qamtamasyz etýdiń bolýy mindetti shart bolyp tabylady. Ol retinde jyljymaly (mamandandyrylǵan tehnıka) jáne jyljymaıtyn múlik qabyldanady. Kepilmen qamtamasyz etý bolmaǵan jaǵdaıda kepil berýshini (ata-analaryn, týystaryn jáne t.b.) tartýǵa bolady», – delingen habarlamada.
Ótinim berý úshin qujattar paketin «Agrarlyq nesıe korporasıasy» AQ fılıalyna tapsyrý qajet.