Alqa otyrysynda Sybaılas jemqorlyqqa qarsy is-qımyl agenttiginiń Tóraǵasy Asqat Jumaǵalı óńirlerde júrgizilip jatqan jemqorlyqqa qarsy jumystyń mańyzdylyǵyn atap ótti, dep habarlaıdy almaty-akshamy.kz.
Aýmaqtyq basshylar qalalar men aýdandardyń ómirinde, turǵyndardyń ál-aýqatyn arttyrýda sheshýshi ról atqarady, sondaı-aq búdjet qarajatyn bólýdi anyqtaıdy. Olar jergilikti jerlerde memlekettik bıliktiń ókilderi bolyp tabylady jáne olardyń tarapynan kez-kelgen paıda kúnemdik kórinisteri eldegi jemqorlyqtyń jaı-kúıi týraly halyqtyń baǵalaýyn qalyptastyrady. Osyǵan baılanysty Sybaılas jemqorlyqqa qarsy qyzmet jergilikti atqarýshy organdar arasyndaǵy jemqorlyqqa qarsy is-qımylǵa erekshe nazar aýdarady. Aǵymdaǵy jyly ákimdik qyzmetkerlerine qatysty 203 qylmys tirkeldi, olar boıynsha 144 adam áshkerelendi.
Máselen, Almaty qalasy boıynsha Sybaılas jemqorlyqqa qarsy qyzmet mádenıet basqarmasy basshysynyń orynbasaryna qatysty tergeýdi aıaqtady. Ol qyzmettik ókilettikterin asyra paıdalaný, búdjet qarajatyn jymqyryp jáne kásipkerlik qyzmetke zańsyz qatysqany úshin kúdiktelýde. Onyń qylmystyq áreketteriniń nátıjesinde memleketke 125 mln teńgeden astam somaǵa materıaldyq zalal keltirildi. Kúdikti sotqa tartyldy.
Qyzylorda oblysy boıynsha Sybaılas jemqorlyqqa qarsy qyzmet oblystyq kásipkerlik jáne ónerkásip basqarmasynyń basshysyna qatysty sotqa deıingi tergeýdi aıaqtady.
Ol ulynyń oqýyna aqy tóleý qajettiligi jáne dızeldi otynmen qamtamasyz etý týraly bıznes ókilderine zańsyz nusqaýlar berý arqyly laýazymdyq ókilettikterin asyra paıdalanǵany úshin kúdikti. Sonymen qatar, sheneýnik óńir kásiporyndarynyń suıytylǵan gazdyń tıisti kólemin alý quqyǵyn shekteý arqyly zańdy kásipkerlik qyzmetke kedergi keltirdi dep kúdiktelýde. Sottyń sanksıasymen kúdikti qamaýǵa alyndy. Qazirgi ýaqytta is prokýrorǵa jiberildi.
Aıta ketý kerek, antıkor jemqorlyq áreketterine tap bolǵan azamattarǵa úndeý jasady. Eger Siz jemqorlyq faktilerine tap bolsańyz, @antikorkz_bot Telegram-boty nemese 1424 nómiri arqyly shuǵyl habarlańyz.