Qazaqtyń birtýar uly Serik Qırabaev 95 jasqa qaraǵan shaǵynda dúnıeden ótti
Kórnekti ádebıettanýshy ǵalym, synshy, akademık Serik Qırabaev ómirden ótti, dep habarlaıdy Almaty-akshamy.kz QazAqparatqa silteme jasap.
Qaraly habardy aqyn Serikzat Dúısenǵazy áleýmettik jeli arqyly jetkizdi.
Fılologıa ǵylymynyń doktory, akademık Serik Qırabaev 95 jasqa qaraǵan shaǵynda dúnıe saldy.
Serik Smaıyluly Qırabaev 1927 jyly 23 naýryzda Qaraǵandy oblysy, Jańarqa aýdany, Atasý aýylynda týǵan.
1951 jyly Abaı atyndaǵy Qazaq pedagogıkalyq ınstıtýtyn bitirgennen keıin aspırantýrada oqı júrip, Qazaqtyń memlekettik kórkem ádebıet baspasynyń aǵa redaktory, «Ádebıet jáne ıskýsstvo» jýrnalynyń bólim meńgerýshisi bolyp istegen. 1952–1955 jyldary «Pıoner» jýrnalynda redaktor, 1955–1958 jyldary. «Sosıalısik Qazaqstan» (qazirgi «Egemen Qazaqstan») gazetinde meńgerýshi, redaksıalyq alqa múshesi boldy.
1958 jyldan Abaı atyndaǵy Qazaq pedagogıkalyq ınstıtýtynda 30 jyl boıy dosent, profesor, fılologıa fakúltetiniń dekany, qazaq ádebıeti kafedrasynyń meńgerýshisi, ınstıtýt rektorynyń oqý isin basqaratyn orynbasary qyzmetterin atqardy. 1988–1995 jyldary Qazaq KSR ǴA-nyń M.O.Áýezov atyndaǵy Ádebıet jáne óner ınstıtýtynyń dırektory, keıinnen bólim meńgerýshisi boldy. Fılologıa ǵylymynyń doktory (1964), profesor (1966), KSRO Pedagogıka ǵylymdary akademıasynyń korespondent-múshesi (1968), QR UǴA-nyń akademıgi (1994), Qazaqstan jáne Qyrǵyzstan respýblıkalary ǵylymynyń eńbek sińirgen qaıratkeri (1977, 1995), Qazaqstan Respýblıkasy Memlekettik syılyǵynyń ıegeri (1996). Qazaq ádebıetiniń ózekti máselerine arnalǵan syn maqalalary men resenzıalary 1948 jyldan bastap jaryq kóre bastady. Sodan bergi ýaqytta 800-den astam ádebı-syn ǵylymı maqalalary men eńbekteri jaryq kórdi. Qazaq KSR Joǵarǵy Keńesiniń Qurmet gramotasymen, «Eńbek Qyzyl Tý», «Halyqtar dostyǵy» ordenderimen marapattalǵan.
1994 jyly Qazaqstan Respýblıkasynyń Ulttyq ǵylym akademıasynyń akademıgi, 1995 jyly Qyrǵyz Respýblıkasynyń Eńbek sińirgen ǵylym qaıratkeri ataǵy berildi. 1996 jyly Qazaqstannyń Memlekettik syılyǵynyń, 2005 jyly «Qazaqstannyń eńbek sińirgen qaıratkeri» qurmetti ataǵynyń ıegeri atandy. 2007 jyldyń 30 naýryzynda QR Tuńǵysh Prezıdenti – Elbasy Nursultan Ábishuly Nazarbaevtyń jeke qabyldaýynda bolyp, qazaq ǵylymyna sińirgen aıryqsha eńbekteri úshin elimizdiń eń joǵarǵy «Otan» ordenimen, 2012 jyly İİ dárejedegi «Barys» ordenimen marapattaldy.