QR Eńbek jáne halyqty áleýmettik qorǵaý mınıstri Serik Shápkenov Úkimet otyrysynda Qazaqstan halqyn jumyspen qamtý sharalary týraly aıtyp berdi, dep habarlaıdy almaty-akshamy.kz
Óz sóziniń basynda mınıstr eńbek naryǵynyń negizgi kórsetkishteriniń oń serpinin atap ótti, bul onyń 2020 jylmen salystyrǵanda birtindep qalpyna kelgenin kórsetedi.
«Ulttyq statısıka búrosynyń málimetterine sáıkes, aǵymdaǵy jyldyń İİ toqsanda jumys kúshiniń sany 9,3 mln. adamdy qurady. Onyń ishinde jumyspen qamtylǵandar sany 73 myń adamǵa artty. Salalar boıynsha qyzmet kórsetý salasynyń úlesi basym, onda ósim 48 myń adamdy qurady.
Budan basqa, pandemıa bastalǵannan beri nátıjesiz jumyspen qamtylǵandar sany 12,2%-dan 7,4%-ǵa deıin qysqardy, al nátıjeli jumyspen qamtylǵan halyq sany 102 myń adamǵa ulǵaıdy. Jumys berýshilerdiń bastamasymen ýaqytsha jumyspen qamtylmaǵandar sany 12,3 esege – 5 myńnan 400 adamǵa deıin azaıdy», – dedi ol.
Serik Shápkenov jumyssyzdyq 4,9% deńgeıinde saqtalǵanyn, al jastar arasyndaǵy jumyssyzdyq deńgeıi, ótken jylmen salystyrǵanda, tómendep, 3,7%-dy quraǵanyn atap ótti.
Eńbekmıniniń basshysy aǵymdaǵy jyly jumyspen qamtý sharalarymen shamamen 1,2 mln adamdy qamtamasyz etý josparlanǵanyn, onyń 700 myńy «Eńbek» memlekettik baǵdarlamasy sheńberinde, 42 myńy Jumyspen qamtýdyń 2020-2021 jyldarǵa arnalǵan Jol kartasy arqyly jáne 440 myńy jańa jumys oryndaryn qurý arqyly qamtamasyz etiletinin atap ótti. Búgingi tańda 1 mıllıonǵa jýyq adam halyqty jumyspen qamtýdy qoldaý sharalarymen qamtyldy.
«Aǵymdaǵy jyldyń 9 aıynda «Eńbek» memlekettik baǵdarlamasy boıynsha 377 myń adam jumysqa ornalastyryldy, olardyń 70%-y turaqty jumysqa turdy. Barlyǵy 65 myń adam oqýmen qamtyldy. Budan basqa, kásipkerlikti qoldaý baǵyty boıynsha 29 myń adam mıkrokredıtter men óteýsiz granttar aldy, olardyń 25 myńnan astamy óz isin alǵash ret ashyp, qosymsha 8 myńǵa jýyq jańa jumys oryndaryn qurdy. Soltústik óńirlerge 5,5 myń adam qonys aýdardy, olardyń ishinde 2,3 myń adam eńbekke qabiletti jasta. Onyń ishinde 1,8 myń qonys aýdarýshy jumysqa ornalastyryldy.
Osylaısha, Nur Otan partıasynyń saılaýaldy baǵdarlamasynda kózdelgen «Eńbek» memlekettik baǵdarlamasy 83%-ǵa oryndaldy. Aqmola, Qostanaı, Pavlodar, Jambyl oblystarynda jáne Nur-Sultan qalasynda barlyq kórsetkishter tolyq kólemde oryndaldy», – dedi Serik Shápkenov.
Mınıstr «Eńbek» memlekettik baǵdarlamasynyń mańyzdy baǵyty qysqa merzimdi oqytý bolyp tabylatynyn, ony bıyl 13,2 myń adam aıaqtaǵanyn atap ótti. Onyń 81%-y jumysqa ornalastyryldy.
Sondaı-aq, Nur Otan partıasynyń saılaýaldy baǵdarlamasymen aǵymdaǵy jyly Elektrondyq eńbek bırjasynda pılottyq rejımde 5 myń jumyssyz azamatty tegin onlaın-oqytýmen qamtamasyz etý kózdelgen, onyń 93%-y kýrstarǵa qatysyp, sertıfıkattar aldy.
«Elektrondyq eńbek bırjasy bazasynda azamattardy onlaın-oqytýdy uıymdastyrý úshin 1 shildeden bastap jumys isteı bastaǵan arnaıy portal ázirlenip, iske qosyldy. Búgingi tańda portalda 135 kýrs avtory jáne 11 myńǵa jýyq qoldanýshy tirkelgen. Kýrstardyń jartysynan astamy tegin jáne kez kelgen qazaqstandyq úshin qoljetimdi. İske qosylǵan sátten bastap barlyǵy 6,6 myń adam oqytýdan ótti, onyń ishinde 4,8 myńy – tirkelgen jumyssyzdar. Kásipkerlikti damytý boıynsha jańa ulttyq joba aıasynda eńbek naryǵynda suranysqa ıe mamandyqtar boıynsha onlaın-oqytýdy portal arqyly damytatyn bolamyz», – dep atap ótti Serik Shápkenov.
Mınıstr sondaı-aq Ulttyq joba aıasynda kásipkerlikti qoldaý sharalaryn «bir tereze» qaǵıdaty boıynsha onlaın-portal arqyly usyný kózdelip otyrǵanyn aıtty.
«Aýdandardyń ekonomıkalyq mamandanýyn anyqtaý úshin 163 master-jospar ázirlenip, memlekettik granttar men mıkrokredıtter osy master-josparlarda qarastyrylǵan baǵyttar boıynsha usynylatyn bolady. Memlekettik granttar berý prosesi tolyǵymen avtomattandyrylady. Bul olardy berý kezinde adamı faktordy boldyrmaıdy, ótinimderdi qaraý merzimin edáýir qysqartady.
Sondaı-aq, Ulttyq joba aıasynda 2025 jylǵa deıin 150 myń adamdy kásipkerlik negizderine oqytý josparlanýda, jastar men halyqtyń áleýmettik osal toptary úshin 100 myń jańa bıznes ıdeıany iske asyrý úshin qaıtarymsyz memlekettik granttar berý kózdelýde», – dedi Eńbekmıniniń basshysy.
Sonymen qatar, Serik Shápkenov Jumyspen qamtýdyń 2020-2021 jyldarǵa arnalǵan jol kartasyn júzege asyrý barysy týraly aıtyp ótti. 225 joba boıynsha jumystar júrgizilýde, olarǵa 7,7 myń adam jumysqa ornalastyryldy.
«Ózge memlekettik baǵdarlamalar men jeke bastamalar aıasynda búgingi tańda 464 myń jumys orny quryldy, onyń 56%-y turaqty bolyp tabylady. Bul jumys oryndarynyń basym bóligi «Nurly jer», «Aýmaqtardy damytý» baǵdarlamalary men jeke bastamalar aıasynda qurylýda», – dedi mınıstr.
Eńbekmıniniń basshysy sıfrlyq jumyspen qamtý ortalyqtaryn engizý boıynsha júrgizilip jatqan jumystar týraly da aıtty.
«Jyl basynan beri jumyssyz retinde tirkeý, jumysynan aıyrylýyna baılanysty áleýmettik tólemder taǵaıyndaý jáne sýbsıdıalanatyn jumys oryndaryna joldama berý qyzmetteri Elektrondyq eńbek bırjasy arqyly tolyq avtomattandyryldy. Osy ýaqyt ishinde 122 myńnan astam azamat joǵaryda atalǵan qyzmetterdi onlaın-rejımde aldy. Onyń ishinde 44 myń adam portal arqyly jumysqa ornalasý múmkindigine ıe boldy jáne 15 myńnan astam adam jumysynan aırylýyna baılanysty áleýmettik tólemder aldy.
2022 jyly «Bastaý bıznes» jobasy boıynsha prosesterdi avtomattandyrý, memlekettik granttar, mıkrokredıtter berý, jumys ornynda jáne jumys berýshiniń tapsyrysy boıynsha oqytý júrgizý josparlanýda. Bul jumyspen qamtý salasyndaǵy barlyq qoldaý sharalaryn avtomattandyrýdy 100%-ǵa deıin jetkizýge múmkindik beredi», – dep atap ótti Serik Shápkenov.
Baıandama sońynda mınıstr eńbek naryǵyndaǵy ózgeristerdiń perspektıvalary, pandemıadan, jańa demografıalyq jaǵdaıdan jáne basqa da faktorlardan týyndaǵan jańa talaptar týraly aıtty.
«Birinshiden, jumys kúshine qoıylatyn talaptar tez ózgerýde. Sarapshylardyń pikirinshe, aldaǵy 5 jylda jumys kúshine qajetti negizgi daǵdylardyń 40%-y ózgeredi, osyǵan baılanysty árbir ekinshi qyzmetkerdi qaıta daıarlaý qajettiligi týyndaıdy.
Ekinshiden, bul demografıalyq táýekelder. Ónerkásip salasynda kadrlardyń qartaıý prosesi júrip jatyr. Bul salada jumys isteıtinderdiń 20%-y ǵana jastar. Aldaǵy ýaqytta jumys kúshiniń 74%-yn «mıllenıaldar» jáne «Z» dáýiriniń ókilderi quraıtyn bolady.
Jáne sońǵysy – jumystyń jańa formattary. Qazirgi ýaqytta «erkin tabys ekonomıkasy» nemese gıg-ekonomıka, frılanserler qarqyndy damýda. Olardyń qyzmetin zańnamalyq retteý jáne eńbek quqyqtaryn qorǵaý boıynsha sharalar qabyldaý qajet», – dedi Serik Shápkenov.
Ol eńbek salasyn beıimdeý úshin mınıstrlik «Kásiptik biliktilikter týraly» zań jobasy, Áleýmettik kodeks jobasy aıasynda ulttyq biliktilik júıesin damytý, jumys kúshin kásiptik oqýdan ótýge yntalandyrý boıynsha birqatar bastamalardy iske asyratynyn habarlady.
Sondaı-aq, Elektrondyq eńbek bırjasy bazasynda onlaın-oqytý portalyn damytý, kásiptik baǵdarlaý boıynsha elektrondyq servısterdi qurý, ıkemdi jumys rejımindegi qyzmetkerlerdi qoldaý boıynsha jumys júrgizilýde.