Alaıaqtar qoldanǵan 6 mobıldi qosymsha anyqtalǵan
Sońǵy kezde ulttyq kompanıalardyń atyn jamylyp, halyqty ınvestısıa salyp, ońaı jolmen aqsha tabýǵa shaqyratyn alaıaqtyq áreketter órship tur, dep habarlaıdy Almaty-akshamy.kz «Qazmunaıgaz» Ulttyq kompanıasynyń baspasóz qyzmetine silteme jasap.
Baspasóz qyzmetiniń habarlaýynsha, ınternette, atap aıtqanda Google, Yandex izdeý júıelerinde, YouTube jáne ózge de áleýmettik jelilerde «munaıǵa ınvestısıa salyp, joǵary tabysqa kenel» degen jeleýmen jarnamalar jappaı taratyla bastaǵan, ol siltemeler alaıaqtar qurǵan arnaıy saıttarǵa baǵyttaıdy.
Halyqty «quryǵyna» túsirý úshin alaıaqtardyń saıtyn «ulttyq kompanıalardyń resmı saıty», sondaı-aq «qarjylyq» nemese «ınvestısıalyq» kompanıalardyń veb-resýrstary retinde kórsetedi. Bul jalǵan qarjylyq kompanıalar belgili bir somaǵa aksıa satyp alýdy usynyp, bir-eki aıda ınvestısıalyq tabys alyp tur degen jeleýmen qyzyqtyrýǵa tyrysady.
Al bul áreketteri nanymdy bolýy úshin olar ulttyq kompanıalardyń osyǵan deıin jarıalanǵan resmı beınerolıkterin qaıta dybystap qoldanady. Nátıjesinde, alaıaqtardyń saıtyna ótkender kompanıa ataýy birneshe ret qaıtalanatyn, kásibı dybystalǵan jalǵan beınerolıkti tamashalaıdy.
Alaıaq saıttardyń algorıtmderi uqsas. Ádette olardyń derekqory joq jáne turaqty HTML saıttar bolyp keledi. Bul olardy USB dıskine kóshirip, bir domennen ekinshisine ońaı tasymaldaýǵa múmkindik beredi. Degenmen, qazir maqsatty aýdıtorıanyń suranysyna baılanysty mátindi jyldam aýystyra alatyn, derekqordy keń, zamanaýı baǵdarlamalyq quraldardy qoldanatyn dınamıkalyq saıttar da kezdesedi. Bul jalǵan saıttardyń ataýy .com sekildi halyqaralyq aımaqtarda tirkeledi.
Mysalǵa sońǵy kezde «Qazmunaıgaz» ulttyq kompanıasynyń atyn jamylǵan jarnamalar azaımaı tur. Kompanıa ókilderi saıttardan bólek, alaıaqtar qoldanǵan 6 mobıldi qosymsha anyqtalǵanyn aıtady.
Qazaqstannyń quqyq qorǵaý jáne basqa da quzyretti organdary osy sekildi alaıaqtyq jolmen ashylǵan resýrstardy anyqtap, olardyń jolyn kesý boıynsha jumys atqaryp jatqanyn aıtady. Degenmen, ınternettegi alaıaqtardyń izine túsip, kinálini anyqtaý qıyn. Ol saıttar kóp jaǵdaıda sheteldik mekenjaılarǵa tirkelgen bolyp shyǵady. Sondyqtan quqyq qorǵaý organdary, qarjylyq uıymdar, ulttyq kompanıalar azamattarǵa alaıaqtardan saq bolýdy eskertedi.
Qazmunaıgaz bul másele boıynsha Qarjy monıtorıńi agenttigine (AFM) jáne Ulttyq bankke ótinish joldaǵanyn málimdedi.
«Bul ótinish İshki ister mınıstrligine berildi. Nátıjesinde Nur-Sultan qalasy polısıa departamentiniń Esil aýdandyq polısıa basqarmasy qylmystyq is qozǵady. QazMunaıGaz osy qylmystyq is boıynsha jábirlenýshi retinde barlyq derekterdi usyndy. Qazirgi ýaqytta atalǵan quqyq buzýshylyqqa qatysty kúdiktilerdi anyqtaýǵa baǵyttalǵan tergeý áreketteri men jedel-izdestirý sharalary júrip jatyr. Kompanıanyń qyzmeti týraly senimdi aqparat tek www.kmg.kz saıtynda jáne áleýmettik jelilerdegi resmı akkaýnttarda jarıalanady», - delingen kompanıa taratqan habarlamada.
Qazaqstandyqtar sondaı-aq 1459 nómiri arqyly Qarjy naryǵyn retteý jáne damytý agenttigine habarlasyp, tutynýshy retinde quqyqtyq keńes ala alady.