Júlde qory 12 300 000 teńge.
Qazaqstan Jazýshylar odaǵy uıymdastyrǵan «Aıtumar» respýblıkalyq baıqaýynyń jeńimpazdary marapattaldy, dep habarlaıdy Almaty-akshamy.kz Qazaqstan Jazýshylar odaǵyna silteme jasap.
Balalar ádebıetiniń úzdik týyndylary úshin 12 300 000 teńge júlde taǵaıyndaldy.
Baıqaýǵa poezıa, proza jáne dramatýrgıa baǵyttary boıynsha 200-ge tarta shyǵarma kelip tústi. Ár janr boıynsha 6 adam jeńimpaz atandy. Ár atalymnan birinshi oryn ıegerine 1 mln teńge berildi. Ekinshi oryn eki adamǵa buıyryp, árqaısysy 800 myń teńgeden alsa, úshinshi orynǵa úsh jeńimpaz anyqtaldy. Olardyń árqaısysy 500 myń teńgeden aldy.
Proza janry boıynsha İ oryn Arman Ádilbek, poezıa janry boıynsha İ oryndy Mereı Qart, dramatýrgıa boıynsha İ oryn Nazerke Qumarǵalıeva jeńimpaz atandy.
Baıqaýǵa 14-35 jas aralyǵyndaǵy Qazaqstan aýmaǵynda turatyn kez kelgen qalamger qatysa aldy. Ár qatysýshydan tek bir ǵana atalym boıynsha shyǵarmalar qabyldandy. Baıqaýda jalpy 18 jeńimpaz marapattaldy.
«Atalmysh baıqaý Balalar jylynyń eń ozyq is-sharalarynyń biri bolyp otyr. Sońǵy jyldary qazaq ádebıetinde balalar ádebıeti janrynyń kenje qalyp bara jatqany, al erekshe balalar úshin ádebıettiń tipti de qoljetimsizdigi jıi aıtylyp júr. Munymen qosa «Meniń atym Qoja» syndy tutas býyndy tárbıeleıtin shyǵarmalardyń joqtyǵyna zıaly qaýym ókilderi qynjylys bildirip jatady. Bul rette Qazaqstan Jazýshylar odaǵy tól ádebıetimizdi damytý úshin aýqymdy jobalar uıymdastyryp keledi. «Aıtumar» balalar ádebıeti týyndylarynyń respýblıkalyq baıqaýy osyǵan dálel», - dedi Qazaqstan Jazýshylar odaǵynyń basqarma tóraǵasy, aqyn Ulyqbek Esdáýlet.
Balalarǵa, onyń ishinde olardyń múmkindigi shekteýli qatarlastaryna qoljetimdi, ári ońaı oqylý úshin baıqaýǵa kelip túsken shyǵarmalardyń aýdıo, elektrondy nusqalary ázirlenedi. Sonymen qatar jeńimpaz atanǵan shyǵarmalar jınaqtalyp, kitap bolyp jaryq kóredi. Kitap elimizdegi 200-ge tarta kitaphanaǵa, ınklúzıvti ortalyqtar men balalar úıine taratylady.