Aısana qazaq tilinde sóıleıdi.
Qazaqstanda qazaq tilinde sóılep, avtomatty túrde jaýap beretin vırtýaldy robot ázirleý jumysy qolǵa alynbaq. Oǵan «Aısana» degen at beriledi. Bul týraly ǴJBM Til saıasaty komıteti daıyndaǵan Qazaqstanda til saıasatyn damytýdyń 2023-2029 jyldarǵa arnalǵan tujyrymdasy jobasynan belgili boldy.
Aısana álemdegi tanymal daýystyq kómekshiler – Google Assistant (Google), Siri (Apple), Amazon Echo ne Alexa (Amazon), Cortana (Microsoft) jáne Alısa (Yandex) vırtýaldy robottarynyń qazaqsha balamasy bolmaq.
«Qazirgi ýaqytta dybystyq kómekshi ázirleýdiń mańyzy zor. Búginde kópshilikke tanymal «Alısa», «Alexa», «Cortana» men «Siri» tárizdi ónimder mátindi pernetaqta men tintýirdi paıdalanbaı engizý, qoldanýshynyń aýyzsha komandasy arqyly qajetti saıtqa, aqparatqa, baǵdarlamalarǵa jyldam qol jetkizý, eske salý, qońyraý shalý, habarlamalar jazý, jańalyqtardy dybystaý, «aqyldy úı» fýnksıalaryn oryndaý, tipti jasandy ıntellektiniń arqasynda jetilip, adammen tolyqqandy dıalog ornatý múmkindigine ıe boldy. Osy rette otandyq «Aısana» vırtýaldy robotyn ázirleý jumystary júrgiziledi», – delingen tujyrymdama jobasynda.
Bul baǵyttaǵy jumystardy iske asyrý úshin Ǵylym jáne joǵary bilim mınıstrligi álemdik İT-kompanıalarmen kelisimge otyrýdy josparlap otyr. Sondaı-aq, qazaqtildi İT-mamandar daıarlaý jáne arnaıy granttar bólý máseleleri sheshiledi.
«Bul sharalardyń iske asyrylýy halyqtyń qazaq tilindegi sıfrlyq saýattylyǵyn arttyrýǵa jáne qazaqtildi tutynýshylardyń suranysyn tolyq qanaǵattandyrýǵa múmkindik beredi», – delingen tujyrymdama jobasynda.
Qujatty jarıa talqylaý merzimi – 21 sáýirge deıin.