Qazaqstannyń eń iri áýe kompanıasy – Air Astana aksıonerlik qoǵamy osy jyldyń úshinshi toqsanyndaǵy jáne 2024 jyldyń 9 aıyndaǵy qarjylyq jáne operasıalyq nátıjelerin jarıalady.
Kompanıanyń málimetinshe, ótken jyldyń sáıkes kezeńimen salystyrǵanda kirister 10,4%-ǵa ósip, 410,0 mln AQSH dollarǵa jetken. Jolaýshy tasymaly ótken jylmen salystyrǵanda 9,9%-ǵa artyp, kompanıa 9 aı ishinde 2,8 mıllıon adam tasymaldaǵan.
Air Astana tobynyń bas atqarýshy dırektory Pıter Foster kompanıanyń ózge de jetistikteri týraly aıtyp ótti:
– Men jalpy avıasıa salasyna jasalyp jatqan qysymdarǵa qaramastan, úshinshi toqsandaǵy qyzmettiń joǵary nátıjeleri týraly qýana habarlaımyn. Biz kompanıanyń tasymaldaý syıymdylyǵy men operasıalyq tıimdiligin arttyrýda aıtarlyqtaı jetistikterge jetýdemiz. Bizdiń flotty damytý jospary kesteden ozyp oryndalyp, ushaqtar sany 57-ge jetti. Sonymen qatar, biz 2024 jyly flottan eki E2 ushaǵyn shyǵardyq, al kelesi jyly da E2 ushaqtaryn shyǵarýdy josparlap otyrmyz, – dedi ol.
Sondaı-aq, Pıter Foster Air Astana tobynyń Japonıa áýe kompanıasymen seriktestik ornatqanyn atap ótti:
– Tamyzda biz álemdegi úzdik áýe kompanıalarynyń biri Japan Airlines (JAL) kompanıasymen kodsherıngtik kelisimge qol qoıdyq. Bul Qazaqstan men Japonıa arasyndaǵy isker adamdar men týrıser úshin qatynasty arttyrady jáne elderimiz arasyndaǵy jolaýshylar legi men taýar aınalymyn keńeıtýge yqpal etedi, – dedi ol.
Taqyrypqa oraı
Áýe bıletin qashan satyp alǵan abzal?
Pıter Foster, Air Astana tobynyń bas atqarýshy dırektory:
– Meniń basty keńesim – ushaqqa bıletti aldyn ala alyńyzdar. Eger Eýropaǵa saıahattaǵyńyz kelse, maýsym nemese qyrkúıek aılaryna bılet alǵan abzal. Azıa qurlyǵyn aralaǵyńyz kelse, qysqy mezgil – eń qolaıly ýaqyt. Biraq kelesi úsh ýaqyttan aýlaq bolǵan jón: Eýropada Rojdestvo men jańa jyl toılanatyn kezeń, sondaı-aq Qytaı jańa jyly. Bul ýaqytta adam kóp, jáne kez kelgen qyzmettiń baǵasy óte joǵary bolady.