14 jeltoqsanda 2022 jyly Astanada óziniń menshikti avıasıalyq-tehnıkalyq ortalyǵynda Air Astana áýekompanıalar toby 2022 jylǵy operasıalyq qyzmetiniń nátıjelerin jarıalady, dep habarlaıdy Almaty-akshamy.kz.
Air Astana áýeparki bıyl úsh Airbus A321LR ushaǵymen tolyqty. Eń jańa 10-shy A321LR búgin túnde tikeleı Gambýrg zaýytynan keldi. FlyArystan sonymen qatar óz parkin úsh Airbus A320 ushaqqa kóbeıtti jáne jyl sońyna deıin taǵy bir Airbus A320neo ushaǵy kelmek. Búgin áýekompanıalar tobynyń parkinde jalpy 42 ushaq bar. Olardyń ortasha jasy 5 jyl, bul álemdegi eń jańa flottarynyń biri. Kelesi jyly Air Astana kompanıalar tobynyń parki alty ushaqqa ulǵaıýy josparlanyp jatyr.
Bıyl Air Lease korporasıasymen 2025 jyldan bastap operasıalyq lızıńke úsh jańa keń fúzelájdy Boeing 787-9 Dreamliner ushaǵyn jetkizý týraly kelisimge qol qoıylǵan.
Búgingi tańda Air Astana áýekompanıasynyń marshrýttyq jelisi 42 baǵytty (27 halyqaralyq jáne 15 ishki), FlyArystan-nyń - 34 baǵytty (8 halyqaralyq jáne 26 ishki) qamtıdy. Air Astana bıyl Iraklıon men Bodrýmǵa jańa turaqty reısterdi ashty, sonymen qatar Almatydan Bangkok pen Beıjińge reısterdi jandandyrdy. FlyArystan Aqtaýdan Baký men Ystambulǵa reısterdi iske qosyp, Shymkent-Kýtaısı, Aqtaý-Dýbaı jáne Shymkent-Dýbaı reısterin qalpyna keltirdi. Kelesi jyly Air Astana áýekompanıasy Medına men Tel-Avıvke reısterdi ashýdy josparlap otyr.
«Bıyl mereıtoılyq jyly Air Astana áýekompanıasy FlyArystan-ǵa tıesili eki Airbus A320 ushaǵyna C2-chek tehnıkalyq qyzmet kórsetýdiń tereńdetilgen túrin ózdiginen oryndady. Biz 10-shy ret «Ortalyq Azıa men TMD-daǵy úzdik áýekompanıa» nomınasıasy boıynsha bedeldi Skytrax syılyǵyna ıe boldyq, bul joǵary sapa standarttaryna adal ekenimizdi dáleldedi. Biz betpe-bet kelgen jahandyq jáne jergilikti qıyndyqtarǵa qaramastan, jańa jetistikterdiń negizin qalap, aımaqtyq jáne halyqaralyq naryqtarda óz ornymyzdy nyǵaıta aldyq. Bizdiń parkke Airbus A321LR jáne Boeing 787 sıaqty ozyq ushaqtary qosylýymen bolashaǵymyz zor bolatynyna kámil senemiz. Munyń bári qyzmetkerlerimizdiń kásibıligisiz jáne tutynýshylardyń qoldaýysyz múmkin bolmas edi. 20 jyl boıy bizdi tańdaǵandaryńyz úshin raqmet», - dedi Air Astana tobynyń prezıdenti Pıter Foster.
Áýe kompanıasy aldaǵy ýaqytta da kadrlardy irikteý men oqytýǵa úlken kóńil bóletin bolady. Áýe tasymaldaýshy ushqyshtar men bortserikterge muqtaj. Ekıpajdy ózdiginen daıyndaý maqsatynda Qazaqstanda alǵash ret Astanada tolyq ushý trenajerymen, sondaı-aq Airbus A320 apattyq-qutqarý rásimderin jattyqtyrýǵa arnalǵan trenajerymen jabdyqtalǵan oqý ortalyǵyn 2023 jylǵy ekinshi jartysynda iske qosýy josparlanyp jatyr.
Sondaı-aq, 2023 jyldyń basynda 7 men 17 jas aralyǵyndaǵy daryndy balalarǵa arnalǵan jolaqy grantynyń áleýmettik baǵdarlamasyn iske qosýy josparlanýda. Baǵdarlama boıynsha balalarǵa jáne olardy alyp júrýshilerge Qazaqstanda jáne shetelde ótetin túrli baıqaýlar men jarystarǵa qatysý úshin tegin bıletter beriledi. Baǵdarlamanyń merzimi men sharttary keıinirek habarlanady.