Órt qaýipsizdigi erejelerin saqtaý qajettigin aıtty.
Almaty qalasynyń TJD Memelekettik órt baqylaý basqarmasy basshysynyń orynbasary, azamattyq qorǵanys podpolkovnıgi Erbolat Tórtqaraev ÓKQ alańynda sóz sóıleı otyryp, bıylǵy jyly tabıǵı gazben ýlanýdyń 9 jaǵdaıy tirkelgenin, 28 adamnyń zardap shekkenin aıtty, dep habarlaıdy Almaty-akshamy.kz.
TJD spıkeri qoǵamdyq tamaqtaný nysandary ıeleri men qyzmetkerleri, jataqhana, jeke úı turǵyndary arasynda turmystyq gaz quıylǵan balondardy qoldaný erejeleri men gaz shyǵý jaǵdaıynda isteletin is-áreketterdi túsindirý jumystary kúndelikti júrgizilip otyratynyn atap ótti.
«Kúnniń sýýymen órt jáne tabıǵı gazdan ýlaný oqıǵalary jıileı túsetinin aıta ketý kerek. Júrgizilip jatqan profılaktıkalyq sharalarǵa qaramastan, bul, ókinishke oraı, jyldan jylǵa qaıtalanyp keledi. Jyl basynan beri tabıǵı gazdan ýlaný boıynsha barlyǵy 9 oqıǵa tirkeldi. Ótken jyldyń osy kezeńimen salystyrǵanda 47%-ǵa (2021 j. – 17) tómendegeni baıqalady. Tabıǵı gazdan ýlanýdan 28 adam zardap shekken, sonymen qatar 2022-2023 jylytý maýsymynda turǵyn úı sektorynda 7 adam kógildir otynnan ýlanǵan», - dedi E.Tórtqaraev.
Qutqarýshy gaz balondaryn durys saqtamaý jáne ony durys paıdalanbaýdyń saldary apattar men qaıǵyly oqıǵalarǵa ákep soqtyratynyn atap ótti. Ol sonymen qatar jaqynda ǵana bolǵan oqıǵalardy mysalǵa keltirdi.
Osy jyldyń 2 qazanynda 12 saǵat 18 mınýtta Almaty qalasy Medeý aýdanynyń 2-shi Kosmodemánskaıa kóshesinde ornalasqan úı murjasynyń (murja bólshektelgen) durys istemeýi saldarynan jekemenshik 2 qabatty turǵyn úıdiń jertólesinde 5 adam tabıǵı gazben ýlanǵan, onyń ekeýi jas bala. Zardap shekkenderdiń barlyǵy medısınalyq mekemelerge jatqyzyldy.
1 jeltoqsan kúni saǵat 16:10-da Túrksib aýdanynyń Chehov kóshesindegi bir páterde gaz jabdyqtaryn paıdalaný talaptary buzylýy sebebinen eki adam gazben ýlanǵan. Zardap shekkender aýrýhanaǵa jetkizilip, tekserýden keıin úılerine qaıtarylǵan. Propan gazy quıylǵan gaz jylytqyshyn úıdi jylytý úshin paıdalanǵan sebepti ýlanǵan.
«Barlyq ýlaný oqıǵalary jylytý qurylǵylaryn paıdalaný kezinde turǵyndardyń salǵyrttyǵy nátıjesinde oryn alady. Mundaı oqıǵalar kóbinese gaz jabdyqtaryn durys paıdalanbaý, gazdyń shyǵýy, rezeńke shlangtyń tozýy, gaz balondaryn durys saqtamaý sebebinen oryn alyp jatady. Turǵyndar mezgilinde tazalanbaǵan, murjalarynyń tartýy jetkiliksiz, jasalýy, shyqqan jeri kúmandy gaz jabdyqtaryn paıdalanady», - dedi podpolkovnık.
TJD ókili Erbolat Tórtqaraev bıylǵy jyly turǵyn úı sektorynda 350 órt oqıǵasy tirkelip, zardap shekkenderdiń sany 29 adam ekenin aıtty.
Tótenshe jaǵdaılardy, adam ólimin, onyń jaraqattanýyn boldyrmaý jáne órttiń aldyn alý úshin órt qaýipsizdigi erejelerin saqtaý qajet, atap aıtqanda:
- gaz quraldaryn paıdalaný kezinde qaýipsizdik sharalaryn saqtaý;
- jylytý peshteri men gaz qurylǵylarynyń janyna jıhaz jáne basqa da janǵysh zattardy qoıýǵa, kıimder men aǵash otyndy keptirýge bolmaıdy;
- aqaýy bar elektr rozetkalardy, elektr ajyratqyshtar men elektr qurylǵylaryn qoldanýǵa bolmaıdy;
- elektr plıtalaryn, útikter, elektr sháınekter jáne kerosındi qurylǵylardy otqa tózimdi stendterge ornalastyrý qajet;
pesh qurylymdaryndaǵy synyqtar men jaryqshaqtardy sylap, murjalardy kúıeden tazartý kerek;
- árbir pesh aýzyndaǵy janǵysh edenge ólshemi keminde 50h70 sm bolatyn temir qańyltyr ornatý kerek.
- bir jelige birneshe elektr qurylǵylaryn qosýǵa jol bermeý kerek, bul elektr jelisiniń shamadan tys júktelýine ákeledi;
- qoldan jasalǵan elektr jylytqyshtaryn qoldanbańyz.