Air Astana áýe kompanıasy el aýmaǵyndaǵy boran men qardyń qalyń túsýine baılanysty reısterdiń keshigýi jáne oryndalmaýy múmkin ekenin málimdedi, dep habarlaıdy Almaty-akshamy.kz.
«Tasymaldaýshy reısti oryndalmaǵan nemese keshikken jaǵdaıda áýe kompanıasy ár eki saǵat saıyn sýsyndar, tórt saǵattan keıin ystyq tamaq beretinin esterińizge salamyz. Eger reıstiń keshigýi kúndiz segiz saǵattan, túnde alty saǵattan artyq bolsa, tasymaldaýshy jolaýshylardy qonaq úıge ornalastyrady, sondaı-aq áýejaıdan qonaq úıge jáne keri baǵytta kólikpen qamtamasyz etedi. Tasymaldaýshynyń kinásinen reıs on saǵattan astam ýaqytqa toqtatylǵan jáne keshikken jaǵdaıda, jolaýshynyń tańdaýy boıynsha tasymaldaýshy jolaýshyny kelesi reıspen jetkizýdi qamtamasyz etedi nemese bılettiń tolyq qunyn qaıtarady», - delingen áýe kompanıasynyń málimetinde.
Osy oraıda áýe reısterine qatysty málimetti kompanıanyń saıtynan kórýge bolady.
«Reıs oryndalmaǵan nemese keshikken jaǵdaıda, airastana.com veb-saıtyndaǵy onlaın-keńesshilerge nemese +7 702 702 01 48 WhatsApp nómirine, sondaı-aq, reıstiń toqtatylýy men keshigýine baılanysty aqshany qaıtarý úshin help.airastana.com saıtyndaǵy Kómek ortalyǵyna habarlasyńyz. Reıs keshikse, myna nómir boıynsha baılanysqa shyǵýǵa bolady: +7 7272 44 44 78», - dep atalyp ótken baspasóz qyzmetiniń habarlamasynda.