Almatyda kólik aınasy urlyǵy qyzyp tur
Almatyda kólik aınasy urlyǵynyń birneshe deregi ashyldy, – dep habarlaıdy Almaty-akshamy.kz Polisia.kz-ke silteme jasap.
Medeý aýdandyq polısıasynyń málimetinshe, eki kún ishinde 3 kóliktiń aınasy qoldy bolǵan. Atalǵan qylmysqa qatysy bar kúdikti ustaldy.
– Burynda osy ispettes qylmys jasaǵany úshin sotty bolǵan 37 jastaǵy kúdikti quryqtaldy. Ol tek BMW, Lexus, Toyota Land Cruiser sekildi qymbat kólikterdiń aınasyna qyzyqqan kórinedi. Óıtkeni atalǵan kólik ıeleri bir ýaqytta shaǵym túsirdi. Atalǵan qylmysty ashýǵa arnaıy jedel tergeý toby quryldy. Nátıjesinde kúdikti ustaldy. Urlanǵan barlyq kólik aınalary qylmystyq iske aıǵaq zat retinde tirkeldi. Kúdiktiniń ústinen QR QK-niń 188-baby boıynsha qylmystyq is qozǵalyp, ol tergeý ızolátoryna qamaýǵa alyndy, – dep málimdedi Almaty qalasy Medeý aýdandyq polısıa basqarmasy bastyǵynyń orynbasary Qanat Jaqypbaev.
QR QK-niń 201-babyna sáıkes ózge aqparat tergeý múddesine oraı jarıa etilmeıdi.