Qaraly qańtar kezindegi 4 jasar qyzdyń ólimi: qyzdyń ákesi sot zalyna kirgizilmedi
Almaty garnızonynyń áskerı sotynda qańtar oqıǵasy kezinde qaza tapqan tórt jasar Aıkórkem Meldehannyń isi boıynsha kezekti sot otyrysy ótip jatyr. İs qupıa, sot jabyq ótti, dep habarlaıdy Almaty-akshamy.kz Zakon.kz-ke silteme jasap.
14 tamyzda qoǵam belsendileri men BAQ ókilderi áskerı sottyń janyna jınaldy. Proses jabyq esik jaǵdaıynda ótip jatyr, sot zalyna tipti marqum qyzdyń ákesin de kirgizbedi.
Muny sot ókilderi iste memlekettik qupıa bolǵandyqtan, qyzdyń ákesi áli ruqsat almaǵanymen túsindirdi. Sondyqtan proses jabyq, onyń ishinde baspasózge de ruqsat berilmedi.
Qyzdyń ákesi Aıdos Meldehan sottan marqum qyzynyń atyna shaqyrtý jibergeni úshin keshirim suraýdy talap etip otyr.
Tórt jasar Aıkórkem Meldehannyń ólimine qatysty sot prosesi shilde aıynyń sońynda bastalǵan. Qylmystyq isti qaraý barysy Bas áskerı prokýratýranyń baqylaýynda. Vedomstvo budan buryn is materıaldarynda jarıa etýge jatpaıtyn qupıa qujattar bar ekenin aıtqan edi.
Tórt jasar Aıkórkem men 15 jastaǵy Janel Meldehan otyrǵan kólikke 2022 jyldyń 7 qańtarynda saǵat 19:00-de Seıfýllın men Sátbaev kósheleriniń qıylysynda birneshe ret oq atyldy. Aıkórkem sol jerde kóz jumdy, ápkesi oqtan jaraqat aldy. İs boıynsha sottalýshy – áskerı qyzmetker.