Áıeline ekonomıkalyq zorlyq-zombylyq kórsetti dep aıyptalǵan dıplomat Sáken Mamash ózine taǵylǵan aıyptarǵa qatysty túsinikteme berdi. Ol óziniń otbasyna degen qarym-qatynasy týraly ashyq aıtty, dep habarlaıdy almaty-akshamy.kz
Mamashtyń aıtýynsha, jary Karına Mamashtyń qolyna jańa iPhone ustatyp, ózi Samsung qoldanǵan. Ol jubaıynyń jaǵdaıyn jasap qana qoımaı, qaıyn jurtyna da kómektesip turǵanyn atap ótti. "Qaıyn ápkemniń oqý aqysyn da tólep berdim," - deıdi dıplomat.
«Zaıybym Karına meni ekonomıkalyq zorlyq jasady dep aıyptady. Biraq men otbasymda «sen», «men», «seniki», «meniki» demedim, tek «biz», «bizdiki» dep júrdim. Sebebi biz birmiz», - deıdi Mamash.
Ol Karına uzatylǵanda, eshqandaı materıaldyq talap qoımaǵanyn da atap ótti.
Mamashtyń aıtýynsha, Karına Ábý-Dabıde júrgende óziniń kredıt kartasyn qoldanǵan, qajetti zattaryn satyp alyp, salondarǵa baryp turǵan. «Úıdiń ár bólmesinde kosmetıkanyń túr-túri úıilip jatatyn», - deıdi ol.
Sonymen qatar, Karına mýzykamen áýestenip, júzdegen dollarǵa óleń jazyp, án shyǵarǵan. Astanada júrgende aqyly akterlyq kýrstarǵa baryp, ózin aktrısa sezinip júrgen. Aǵylshyn tili men avto júrgizý kýrstaryna da barǵan.
«Otbasymnan aqshany aıamadym. Úıde tórt adam bolsaq, jubaıymnyń kıim-keshegi qalǵan úsheýimizdikinen eki ese kóp shyǵar. Elge kóship kelerde 15 qoraptyń 8-9-y Karınanyń kıim-keshegi boldy», - deıdi Mamash.
Sáken Mamash óziniń de, áıeliniń de ákesiz óskenin atap ótti. «Jubaıym Karınamen súıip qosyldym. Anasy Janarǵa rahmet, bizdi qoldap, qyzyn uzatty. Ekeýmiz de ákesiz jetim óskenbiz, eki jarty bir bútin boldyq», - deıdi ol.
Mamash otbasy birinshi orynda ekenin, januıasyn Allanyń amanaty dep qabyldap, olardyń búgini men erteńine barlyq jaýapkershilikti tolyq sezinetinin aıtty. «Ulym men qyzym meniń ómirimniń máni, jalǵasy, shejirem emes pe? Olardy qazaqı tárbıemen, ımanǵa jaqyn, adal, bilimdi, meıirimdi etip tárbıeleýdi armandadym», - dep túıindedi ol.