Bul syılyqtyń ereksheligi – úzdik dep tanylǵan shyǵarmalar basyp shyǵarylyp, kitaphanalarǵa taratylady
Qazaqstan Respýblıkasy Mádenıet jáne sport mınıstrligi «Aıboz» ulttyq tuńǵysh ádebı syılyǵyna baıqaý jarıalady, dep habarlaıdy Almaty-akshamy.kz Mádenıet jáne sport mınıstrliginiń baspasóz qyzmetine silteme jasap.
«Úzdik proza», «Úzdik poezıa», «Úzdik drama», «Úzdik kórkem aýdarma», «Úzdik balalar ádebıeti», «Úzdik komıks» jáne «Kitaptyń úzdik dızaıny» nomınasıalary boıynsha jeńimpaz atanǵandar 5 mıllıon teńgeden aqshalaı syılyq alady.
Konkýrs nátıjesinen soń olardyń eńbekteri 500 danamen jaryq kóredi.
Búgin ulttyq ádebı syılyqtyń tusaýkeseri zıaly qaýym ókilderiniń, aqyn-jazýshylardyń qatysýymen ótti. Mádenıet jáne sport mınıstri Dáýren Abaev bul jobanyń mindeti – ádebıetshilerdi qoldaý ǵana emes, sonymen qatar jazýshylyq ónerdiń aıryqsha áleýmettik mańyzdylyǵyn qoǵamǵa kórsetý ekenin atap ótti.
«Jasyratyn nesi bar, «Qazaq qalamgeri qashan Nobel alady?», «Ulttyq ádebıetimizdiń qazirgi deńgeıi qandaı?», «Qazaqsha aýdarmanyń hali neshik?» degen suraqtar kóbimizdiń kókeıimizde júrgeni ras. Qazaq zıalylarynyń yqpaly qashan artady, olar ult sanasyna, qoǵam oıyna qalaı áser etedi dep te jıi oılaıtynymyz anyq. Árıne, bul saýaldardy ár qyrynan qarastyryp, oǵan túrli jaýap izdeı berýge bolady. Keıbir suraqqa jaýap tabarmyz, keı tusta únsiz qalýymyz múmkin. Biraq bir aınymas dúnıe bar – bizdiń ultymyz jalǵyz, zıalylarymyz sanaýly-aq. Sol úshin ultymyzdy ulyqtap, zıalylarymyzdy alaqanǵa salyp, qurmet tutýǵa tıispiz»,- dedi Mádenıet jáne sport mınıstri Dáýren Abaev.
«Basty maqsatymyz – tól ádebıetimizdi tyń dúnıelermen tolyqtyryp, ony jańasha bıikke kóterý, sondaı-aq, ultymyzdyń ádebı murasyn molaıtyp, otandyq ádebıetke jańa serpin berý. Bul syılyqtyń taǵy bir ereksheligi – úzdik dep tanylǵan shyǵarmalar basyp shyǵarylyp, kitaphanalarǵa taratylady. Qatysýshylardyń jasyna, eńbek janryna, jazý tiline shekteý joq. Eń bastysy – shyǵarma mazmundy, ózekti bolýǵa tıis. Qysqa bolǵanymen eldiń esinde qalyp, jurtshylyqtyń aýzynan túspeıtindeı týyndy jazsa, báıge soǵan buıyrady. Bul-otandyq kitap shyǵarý isi men ádebıetti qoldaý baǵytynda júzege asyryp jatqan is-sharalardyń biri ǵana. El Prezıdenti belgilep bergendeı, bizdiń túpki maqsatymyz – oqıtyn ult qalyptastyrý. Ol úshin biz «Jańa qazaq ádebıeti» serıasyn qosa alǵanda, jas avtorlardy qoldaýdyń jańashyl tetikterin quryp, memlekettik sýbsıdıalaý kólemin ulǵaıtyp jatyrmyz. Granttar men syılyqtar jarıalap, kitap jármeńkelerin ótkizip kelemiz. Bolashaqta proza, poezıa jáne dramatýrgıadaǵy eń myqty jas talanttardy qoldaý jáne tabıǵı qabiletin shyńdaýǵa arnalǵan «ádebı zerthana» ashýdy josparlap otyrmyz», – dedi Dáýren Abaev.
Sonymen qatar kelesi jyldan bastap Mádenıet jáne sport mınıstrligi qazaqstandyq jas jazýshylar men aqyndar úshin Prezıdenttiń arnaıy ádebı syılyǵyn taǵaıyndaýdy kózdep otyr.
«Syılyq 18-29 jas aralyǵyndaǵy jas qalamgerlerge «Proza», «Poezıa», «Dramatýrgıa», «Balalar ádebıeti» nomınasıalary boıynsha buryn jarıalanbaǵan shyǵarmalary úshin tabystalady. Odan bólek bıyl «Jańa qazaq ádebıeti» serıasymen kitaptar jaryq kórgeli otyr. Bul serıamen buryn shyǵarmasy esh jerde jaryq kórmegen jas avtorlardyń týyndylary iriktelip, 3 myń tırajben basylyp shyǵarylady», - dedi basshy.
Kóbelektiń qanatynan týǵan tolqyn alyp muhıttardy shaıqaıdy.
«Bizdiń shyǵarmashylyqqa beretin búgingi serpinimiz erteńgi álemdik klasıkanyń irgetasy ekenine shyn senýimiz kerek. Aqynynyń qalamyn qadirlegen, sózdiń kıesine sengen jurt ozady, jazýshysynyń jaǵdaıyn oılaǵan ulttyń bolashaǵy kemel. Álemdi ózgerter áıgili shyǵarmalar áli de qazaq topyraǵynda dúnıege keledi. Jańa qazaq ádebıetiniń jolaıryǵyndaǵy búgingi sapar sátti bolsyn! Talantty jazýshylarymyz ben arqaly shaıyrlarymyzdyń qalamyna shabyt tileımin!», - dep aıaqtady sózin Dáýren Abaev.