Mektep bitirýshi túlekterdiń qaýipsizdigin qamtamasyz etýge jáne quqyq buzýshylyqqa jol bermeý úshin barlyq ótkiziletin is sharalar mektep aýlasynda ótedi
16 maýsym kúni oblystaǵy barlyq bilim berý uıymdarynda atestat tapsyrý rásimi ótkiziledi, dep habarlaıdy Almaty-akshamy.kz.
Osyǵan baılanysty mektep bitirý keshin meıramhanalarda nemese oıyn-saýyqtyq ortalyqtarda ótkizýge qatań tyıym salynady. Tıisinshe, mektep bitirý keshi bilim ordalarynyń aýlasynda qarapaıym túrde uıymdastyrylady. Bul týraly Óńirlik komýnıkasıalar qyzmetinde ótken brıfıńte oblystyq bilim basqarmasynyń bólim basshysy Nurlan Dáýletálıev málimdedi.
Óńirde negizgi orta bilim týraly atestatty alatyn, ıaǵnı 9 synypty bitirýshiler sany – 14 543 qurasa, onyń 1 765-i «Úzdik atestat» ıegeri. Al 11 synypty bitirýshi túlekter sany – 7506 oqýshy. Onyń 415-i «Altyn belgige» úmitker bolsa, 804 oqýshy «Úzdik atestat» ıegeri.
«Mektep bitirýshi túlekterdiń qaýipsizdigin qamtamasyz etýge jáne quqyq buzýshylyqqa jol bermeý úshin barlyq ótkiziletin is sharalar mektep aýlasynda ótedi. Bul sharaǵa barlyq oqýshylar mektep formasymen qatysýǵa mindetti. Sonymen qatar, mektep bitirýshi túlekterdiń tabıǵat aıasyna nemese sý aıdyndaryna barýyna bolmaıtynyn eskertemiz. Balalardyń qaýipsizdigin qamtamasyz etý úshin medısına qyzmetkerleri, órt sóndirý mamandary jáne ishki ister organdary jumyldyryldy. Adamdar kóp shoǵyrlanatyn demalys oryndary men oıyn-saýyq ortalyqtaryna mektep ákimshiliginen quralǵan kezekshilik top reıd jumystaryn júrgizedi. Taǵy bir eskertetin jáıt, ata-analar tarapynan aqsha nemese syılyqtar berilýine tyıym salynady», - dedi oblystyq bilim basqarmasynyń bólim basshysy Nurlan Dáýletálıev.
Qoǵamdyq tártipti saqtaý maqsatynda árbir bilim berý ordalarynda 2 polısıa departamentiniń qyzmetkeri bekitilgen. Olar kúsheıtilgen rejımde jumys isteıtin bolady.
«Erteńgi bolatyn atestat tapsyrý rásimi kezinde qaýipsizdikti barynsha saqtaýǵa polısıa departamentiniń qyzmetkerleri daıyn. Qala ishinde kóliktermen avtosherý ótkizýge bolmaıtynyn eskertemiz. Ásirese tańdy qarsy alý úshin sý jaǵalaýlaryna barýǵa bolmaıdy. Eger de eskertýge qaramastan quqyq buzýshylyq oryn alǵan jaǵdaıda mektep bitirýshi túlekterdiń zańdy ókilderine ákimshilik shara qaralady», - dedi oblystyq polısıa departamentiniń jergilikti polısıa qyzmeti basqarmasy bastyǵynyń orynbasary Baqyt Moldabekov.