Aıaq kıimmen namaz oqýǵa bola ma? Bul suraqqa Fatua_kz-ke Qazaqstan musylmandary Dinı basqarmasy "Sharıǵat jáne pátýa" bóliminiń mamany Elbek Tasbolatuly jaýap berdi, - dep habarlaıdy almaty-akshamy.kz.
Mamannyń aıtýynsha, namazdy aıaq kıimmen oqýǵa bolady, alaıda munda eskerý kerek jaıttar bar.
"Qazir sýyq mezgil. Paıǵamdarymyz Sallalahý áleıhı ýá sállám sahabalarmen birge aıaq kıimmen namaz oqyǵan. Keıbir kisiler "aıaq kıimmen dárethanaǵa kiremiz ǵoı, sol aıaq kıimmen namazǵa tura berýge bola ma?" surap jatady. Dárethana kir bolýy múmkin, biraq ol mindetti túrde las bolady degen sóz emes. Aıaq kıimmen kirdi basqan kezde ol namazǵa jaramdy, ol júrgen kezde tazalanyp ketedi. Al endi nájisti basýdaǵy jaǵdaı ózgeshe, nájisti basýdyń eki túri bolady. Birinshisi, qoıý nájis. Qoıý nájisti basqan kezde ony jerge, qaǵazǵa súrtip, nájistiń áseri qalmasa, ol tazarǵan bolyp eseptelinedi. Ekinshisi, zár sekildi suıyq nájis. Suıyq nájisti basqan kezde ony bir ret sýǵa jýyp jiberse tazalanady, ıaǵnı áseri qalmaıdy.
Al aıaq kıimniń astynda naqty nájis bar ekenin bilmegen jaǵdaıda, ony bir tekserýge bolady. Eger nájistiń áseri bolmasa, aıaq kıim taza. Onymen namaz oqı berýge bolady, bul eshqandaı dinimizge qaıshy emes. Sondyqtan, kerisinshe, sýyq, aıaz kezde densaýlyǵymyzdy saqtaýymyz kerek. Qajettilik bolsa namazdy aıaq kıimmen oqýǵa bolady", - dep jaýap berdi Elbek Tasbolatuly.