Búginde qoǵamda MÁMS-ke, ıaǵnı mindetti áleýmettik medısınalyq saqtandyrý júıesine kóńil tolmaýshylyq basym. Bul júıeni Memleket basshysy da synǵa alyp, naqty mindetter júktegen bolatyn. Qazir jańadan taǵaıyndalǵan Densaýlyq saqtaý mınıstri Aqmaral Álnazarova da «jyry» bitpegen MÁMS júıesine jan-jaqty taldaý júrgizip, onyń tıimdiligin arttyrýǵa tyrysamyn dep otyr.
Osy oraıda bizge turǵyndar tarapynan eń jıi qoıylatyn saýaldardyń biri – «Men MÁMS-ke aı saıyn jarna aýdaramyn. Biraq dárigerge aı saıyn qaralyp jatqan joqpyn. Sonda ol aqsha qaıda ketip jatyr?».
Bul suraqty biz sala mamany, Áleýmettik medısınalyq saqtandyrý qorynyń Almaty fılıaly dırektory Tileýhan Ábildaevqa qoıǵan bolatynbyz.
– Qazaqstan saqtandyrýdyń jınaqtaý emes, ortaq jaýapkershilik prınsıpine negizdelgen modelin tańdap aldy. Sebebi, tólenetin jarnalardyń mólsheri kóp emes. Sondyqtan bir adamnyń jınaqtaǵan aqshasy medısınalyq qyzmet aqysyn tóleýge de jetpeıdi. Qarapaıym mysal: aı saıyn 3500 teńge tólep saqtandyrylatyn ózin-ózi jumyspen qamtyǵan azamattar bir jylda 42 000 teńge tóleıdi. Eger biz ár adamdy óz qarajatyna ǵana emdeıtin bolsaq, onyń jınaǵan aqshasy eshteńege jetpes edi. Mysaly, pnevmonıany emdeýge ketetin shyǵyn 100 myń teńge, bosandyrý 100 myń teńge, al ortokoronarlyq shýnttaý 3-4 mln teńge turady. Eger bizde jınaqtaý júıesi bolsa, azamattar medısınalyq qyzmet aqysyn ózi jınaǵan qarajaty esebinen tóleı almas edi. Al ortaq jaýapkershilikke negizdelgen MÁMS júıesinde qarjy ortaq shottan alynady. Taǵy bir eskeretin jaıt, siz dárigerdiń kómegine júginbegen bolsańyz, tólegen aqsha joǵalyp ketti degendi bildirmeıdi. Ol sizdiń jaqyndaryńyzdy nemese aýrýhanada jatqan ózge de otandastarymyzdy emdeýge jumsalyp jatyr, – dedi Tileýhan Ábildaev.