Megapolıste respýblıkalyq İİ Óńirlik merzimdi basylymdar forýmy ótip jatyr
Almaty qalasyndaǵy «Dostyq úıinde» Qazaqstan Respýblıkasy Mádenıet jáne aqparat mınıstrliginiń uıymdastyrýymen Óńirlik merzimdi baspasóz basylymdarynyń respýblıkalyq İİ forýmy ótip jatyr. Eki kúnge josparlanǵan aýqymdy is-sharaǵa elimizdiń aımaqtarynan aqparat salasyn damytýǵa úles qosyp júrgen 100-den astam medıa maman keldi.
Forýmnyń basty maqsaty – zamanaýı medıa salasy boıynsha ońtaıly ádis-tásilderdi qarastyryp, tájirıbe almasý, merzimdi baspasóz salasyndaǵy ózekti máseleler boıynsha pikirtalas alańyn uıymdastyrý.
Alqaly jıynnyń birinshi kúni «Basylymdarda sanaly kontentti qalyptastyrý», «Baspa basylymdaryn tanymal etý jáne taratý: aımaqtyq qyrlary» jáne «Salalyq jýrnalısıka» taqyryptarynda paneldik otyrystar ótti.
– Buqaralyq aqparat quraldary – halyq men bılik arasyndaǵy altyn kópir. Sondyqtan memleket aqparat quraldarynyń erkin de sapaly jumys isteýi úshin árdaıym qoldaý kórsetip otyrady. Óńirdegi halyqtyń kóńil kúıin jetkizetin tilshiler bolǵandyqtan, aımaqtaǵy ahýaldyń bet-beınesi jetkiziletin aqparattyń sapasyna baılanysty ekeni de belgili. Eki kúndi qamtıtyn forým óńirlerden kelgen aqparat ókilderi úshin jemisti ári tıimdi bolady dep senemin», – dedi alǵashqy paneldik otyrysta sóz alǵan Qazaqstan Respýblıkasy Mádenıet jáne aqparat mınıstrligi Aqparat komıtetiniń tóraǵasy Meıirlan Rahanov.
İİ Óńirlik merzimdi basylymdar forýmynda QR Parlamenti Senatynyń depýtaty Nurtóre Júsip, QR Parlamenti Májilisiniń depýattary Qazybek Isa men Ermurat Bápı, QR Prezıdenti Baspasóz hatshysynyń orynbasary Erjan Baıtiles, Almaty qalasy Qoǵamdyq damý basqarmasynyń basshysy Aıdar Esenbekov sóz sóıledi.
Alqaly toptyń aldynda «Alatau Aqparat medıaholdınginiń Bas dırektory Erjan Qalymbaıuly da sóz tizginine ıe bolyp, óńirlik buqaralyq aqparat quraldarynda kontent sapasyn arttyrý týraly oı-pikirlerimen bólisti.
Forýmnyń plenarlyq otyrysynda «Jas alash» gazetiniń Bas redaktory Almas Núsip pen «Mysl» jýrnalynyń Bas redaktory Asyl Saǵymbaev saraptamalyq materıal jazýdyń stıli týraly sóz qozǵasa, fılologıa ǵylymynyń doktory Orynaı Jubaeva baspasóz betterinde qate qoldanylyp júrgen sózder men tirkester týraly tarqatty. «Dat» gazetiniń Bas redaktory Qutmaǵanbet Qonysbaev, «Kýrsıv» gazetiniń shef redaktory Tatána Nıkolaeva, «Kazahstanskaıa pravda» gazetiniń fototilshisi Iýrıı Bekker de tilshi qaýymynyń kásibı sheberliginiń mańyzdy qyrlary týraly tilge tıek etti.
Al búgin ınternet rýsýrstary men áleýmettik jelidegi aqparattar aǵyny arasynda merzimdi basylymdardy básekege qabiletti etý, baspa basylymdarynda YouTube arnasyn qalaı damytýǵa bolatyny, jasandy ıntellekt, basylymdardyń balalar kontentin qalyptastyrýdyń ıdeologıalyq sharttary men tetikteri týraly oı-pikirler sarapqa salynatyn bolady.