Bıyl Ult ustazy, memleket jáne qoǵam qaıratkeri, ǵalym-reformator - Ahmet Baıtursynulynyń týǵanyna 150 jyl toldy.
2022 jylǵy 11 qarasha kúni, saǵat 10.00-de Almaty qalasy ákimdiginiń qoldaýymen Almaty qalasy mýzeıler birlestiginiń uıymdastyrýymen Dostyq úıiniń ǵımaratynda (Almaty qalasy, Qurmanǵazy kóshesi 40) «AHMET BAITURSYNULY – ULT USTAZY» atty halyqaralyq ǵylymı-tájirıbelik konferensıa ótedi, - dep habarlaıdy almaty-akshamy.kz
Konferensıanyń maqsaty – otandyq jáne sheteldik ǵalymdardyń qatysýymen Ahmet Baıtursynuly muralaryn jan-jaqty ǵylymı taldaý, ahmettaný ǵylymynyń ózekti máselelerin talqylaý, sońǵy kózqarastar men jańa tujyrymdarǵa jol ashý.
Konferensıaǵa otandyq jáne alys-jaqyn shetelderden 100-den astam ǵalym-zertteýshiler qatysady. Onyń ishinde profesor Nergız Bıraı, profesor Gúljanat Erdjılasýn, Bekir Túmen Somynjyuly (Túrkıa), doktor Phd Ózgejan Kısıjı (Germanıa), profesor Hısao Komasý (Japonıa), profesor Kım Sań Chol (Koreıa), profesor Mahanbet Júsipov, Bahrom Irzaev (Ózbekstan), dosent Zýhra Altymysheva (Qyrǵyzstan) sekildi ǵalymdar baıandama jasaıdy.
Sonymen qatar, 12 tomdyq Ahmet Baıtursynulynyń shyǵarmalar jınaǵy jáne Túrkıadaǵy Pamýkkale ýnıversıtetiniń profesory, alashtanýshy ǵalym Nergız Bıraıdyń Ahmet Baıtursynuly týraly zertteý kitaby sekildi eki birdeı súbeli eńbektiń tusaýy kesiledi.