Almaty qutqarýshylary jylytý maýsymynda órt qaýipsizdigine saq bolýdy eskertedi.
Almaty qalasynyń qutqarýshylary Óńirlik komýnıkasıalar qyzmetiniń alańynda baspasóz konferensıasyn ótkizdi. Onyń barysynda jylytý maýsymymen birge órt qaýpi týyndaıtyn jaǵdaılar týraly aıtty, dep habarlaıdy Almaty-akshamy.kz.
Órt sanynyń azaıǵanyna qaramastan, bıyl gaz qurylǵylaryn turmysta paıdalaný kezinde 4 qaıǵyly oqıǵa tirkelgeni belgili.
TJD málimeti boıynsha, tabıǵı gazdan 5 adam ýlanǵan (onyń ishinde 3 bala), taǵy bes adamdy ártúrli dárejedegi kúıik shalǵan.
ÓKQ brıfıńinde olar bıylǵy jyldyń 2 qazanynda Medeý aýdanynda jeke turǵyn úılerdiń birinde (onyń jertólesinde) úı ishindegi murja aqaýynyń saldarynan (murja bólshektelgen kúıde) bes adam tabıǵı gazdan ýlanǵan, onyń ekeýi 2019 jáne 2022 jyly týylǵan balalar. Abyroı bolǵanda, aýrýhanada medısınalyq kómek kórsetilgennen keıin olar úılerine shyǵaryldy.
Osyǵan uqsas taǵy bir oqıǵa 31 qazanda Alataý aýdanynda 2 qabatty jeke turǵyn úıde boldy, 5 adam kógildir otynnan ýlanǵan, onyń ishinde úsheýi 2014, 2012, 2021 jyly týylǵan balalar) Tekserilip, medısınalyq kómek kórsetilgennen keıin olar úılerine jiberilgen.
Memlekettik órtti baqylaý basqarmasynyń basshysy Danıar Júsipov megapolıs turǵyndaryna gaz balondary men gaz jabdyqtaryn tek osy ónimderdi satýǵa sertıfıkattary bar mamandandyrylǵan uıymdardan satyp alǵan durys ekenin aıtty.
«Mamandardyń qyzmetine júgine otyryp, jyl saıyn gaz jabdyqtaryn mindetti túrde tekserý kerek. Jeldetý qubyrlarynyń jaramdy istep turǵan-turmaǵanyn baqylaý kerek, bólmeni únemi jeldetý kerek, ásirese uıqyǵa jatar aldynda. Gaz qurylǵylaryn paıdalaný kezinde qaýipsizdik sharalaryn saqtaý, sonymen qatar jıhazdy jáne basqa da janǵysh zattardy jylytý peshteri men gaz qurylǵylarynyń janyna qoımaý, kıimder men otyndy keptirmeý óte mańyzdy», - dedi qutqarýshy.
Danıar Júsipov qalada jylytý maýsymy bastalǵaly jeke sektorda órtke qarsy qaýipsizdikti baqylaý sharalary kúsheıtilgenin aıtty.
«Almaty qutqarýshylary jeke sektordy tekserý barysynda órt qaýipsizdiginiń 90-ǵa jýyq buzýshylyǵyn anyqtady. Ondaǵan úıdiń jaǵdaıy nashar bolǵandyqtan, murjalardy tazalaý, peshtegi jaryqtardy jóndeý, elektr symdaryn aýystyrý, kómirqyshqyl gazyn anyqtaý qurylǵylaryn ornatý jáne basqa da sharalar jasaý qajet boldy. Halyqtyń áleýmettik osal toptaryna erekshe kóńil bólindi. Máselen, tizimder túzetilip, 792 turǵyn úı esepke alyndy. Osyǵan baılanysty, qyrkúıek aıynda «Kómek qoly» aksıasy uıymdastyrylyp, onyń barysynda az qamtylǵan otbasylarǵa gaz dachıkteri ornatyldy, buryn ornatylǵan dachıkterdiń batareıalary aýystyryldy, basqa da órtke qarsy jáne profılaktıkalyq kómekter kórsetildi», - dedi Danıar Júsipov.
Sonymen qatar, bıyl 151 934 jeke turǵyn úı esepke alynǵan, onyń ishinde 1205 úı qatty otynmen jylytylady. Búgingi kúni olar 100% tekserýden ótti.
Brıfıńke Almaty qalasy Tótenshe jaǵdaılar departamenti Memlekettik órtti baqylaý basqarmasynyń bas mamany Qaıyrjan Aqshaıyqov ta qatysty. Onyń aıtýynsha, 2018 jyldan beri halyqtyń áleýmettik jaǵynan osal toptarynyń 1340 úı gaz ıisinen qorǵaıtyn dachıktermen jabdyqtalǵan.
«Iisten qorǵaıtyn dachıkterdiń arqasynda adam ómirin saqtap qalǵan eki jaǵdaı boldy», - dedi spıker.
Jýrnalıserdiń suraqtaryna jaýap bergen olar gaz ıisinen ýlaný belgisi bas aýrýy, álsizdik, bas aınalý, estý jáne kórý qabiletiniń tómendeýi, júrek aıný túrinde kórinetinin aıtty. Qatty ıis tıip aýyrǵan adam esinen tanyp qalýy múmkin, terisi bozaryp, tyrysqaq paıda bolady. Aqyr sońynda, júrek pen tynys alýdyń toqtaýynan adam ólip ketýi múmkin. Mundaı jaǵdaıda zardap shegýshige alǵashqy kómektiń durys kórsetilgegi óte mańyzdy.
«Adamdy taza aýaǵa shyǵaryp, aıaǵyn joǵary kóterip jatqyzý kerek, tar kıimin bosatyp, músátir spırtin ıisketý kerek. Eger zardap shegýshi tynys almasa, qoldan dem aldyrý kerek. Mindetti túrde jedel járdem shaqyrý qajet. Eger bul múmkin bolmasa, adam óz-ózine kelgennen keıin zardap shegýshini medısınalyq mekemege jetkizýge tyrysý kerek», - deıdi qutqarýshylar.