Vengrıa - beıbit atom salasyndaǵy kóshbasshylardyń biri
Qazaqstan delegasıasy eldiń energetıkalyq qaýipsizdigi men táýelsizdigin qamtamasyz etý úshin «Paksh» AES-in keńeıtý boıynsha vengrıalyq áriptesterdiń tájirıbesimen tanysty, dep habarlaıdy Almaty-akshamy.kz.
«Samuryq-Qazyna» qorynyń basqarma tóraǵasy Almasadam Sátqalıev jáne «Qazaqstan atom elektr stansıalary» JSHS dırektory Tımýr Jantıkın Býdapeshtte Syrtqy ister mınıstrligi, Vengrıanyń Energetıka mınıstrligi jáne Atom energıasy agenttiginiń ókilderimen, sondaı-aq «Paksh» AES jáne EXIM bankiniń basshylyǵymen kezdesti. Sapar baǵdarlamasynda atom stansıasyna jáne bolashaq jańa energıa bloktarynyń qurylys alańyna barý qarastyrylǵan.
Vengrıa - beıbit atom salasyndaǵy kóshbasshylardyń biri
Vengrıa elektrogenerasıa kózderi arasyndaǵy Atom úlesi boıynsha álemniń TOP-5 eliniń qataryna kiredi.
2021 jyly «Paksh» AES eldiń elektr energıasyna qajettiliginiń 46,8% -qamtyp, saǵ*15 121 mln kVt elektr energıasyn óndirdi. Stansıa 2500-den astam adamdy jumyspen qamtamasyz etedi.
AES Memlekettik kompanıanyń enshiles qurylymyna jatady, al sheshýshi daýys berý quqyǵy Vengrıa úkimetine tıesili.
«Paksh» - Vengrıadaǵy jalǵyz AES. Ol Dýnaı jaǵasynda, Býdapeshtten ońtústikke qaraı 100 km jerde ornalasqan. Tórt energoblok 35-40 jyldan beri jumys istep keledi. Elektr energıasynyń kólemin arttyrý úshin taǵy eki qurylys salý josparlanýda. PAKSH AES-in keńeıtý ártúrli elderdiń kompanıalary qatysatyn halyqaralyq joba. Mysaly, týrbınalardy General Electric (GE) energetıkalyq qondyrǵylarynyń iri halyqaralyq óndirýshisi jetkizedi. Onyń ókilderi de Qazaqstan delegasıasymen kezdesýge qatysty. GE Steam Power-diń komersıalyq dırektory Gabor Seneshtiń aıtýynsha, kompanıa ozyq energetıkalyq tehnologıalardy, sonyń ishinde AES úshin baıaý júristi bý týrbınalaryn usynady: «Bizdiń atom energetıkasyndaǵy tájirıbemiz 60 jyldan astam ýaqytty quraıdy, al AES-te ornatylǵan bý kúsh jabdyǵynyń jıyntyq qýaty 200 GVt quraıdy».
Álemdik tájirıbe «sıasy keppegen»
Qazaqstan ókilderin «Paksh» AES-in keńeıtý úshin ónim berýshi men tehnologıany tańdaý, Vengrıanyń halyqaralyq áriptestermen ózara is-qımyl jasaý tájirıbesi, AES-tyń elektr energıasynyń baǵasyna áseri, stansıa jumysynyń qaýipsizdigi, jobaǵa jergilikti bıznestiń qatysýy erekshe qyzyqtyrady.
«Bizdiń saparymyz tek praktıkalyq sıpatta. Sizderdiń AES salý jáne paıdalaný jónindegi tájirıbelerińiz bizdi tańdandyrdy. Bizdiń qoǵam úshin qazaqstandyq AES jobasynyń Halyqaralyq bolýy óte mańyzdy", - dedi A.Sátqalıev. Onyń aıtýynsha, stansıa qurylysynyń egjeı-tegjeıi týraly túpkilikti sheshimdi Qazaqstan Úkimeti qabyldaýy tıis.
Vengerlik áriptester AES qurý barysynda qoǵammen jarıalylyq jáne ashyq dıalog óte mańyzdy ekenin atap ótti. Olardyń aıtýynsha, stansıany salmas buryn azamattardyń kópshiliginiń qoldaýyna júginý kerek.
Qarjylandyrýdyń jańa kózderi
Sondaı-aq, Qazaqstan delegasıasy Vengrıanyń «EXIM Bank» eksporttyq-kredıttik agenttiginiń basshylyǵymen kelissózder júrgizedi. Ol halyqaralyq saýda jáne ınvestısıalarmen aınalysady, álemniń 150 elimen yntymaqtastyq ornatqan.
«Samuryq-Qazyna» basshylyǵy «EXIM Bank» - ti Qordyń Qazaqstandaǵy basym ınvestısıalyq jobalaryn qarjylandyrýǵa qatysýǵa shaqyrady. Olardyń ishinde-energetıka salasyndaǵy jańa qýattylyqtar, temirjol joldaryn qurý, 5G jelisin damytý bar.