5 qyrkúıek – Qazaqstan halqy tilder kúni. Bul kún elimizde turatyn túrli etnos ókilderiniń mádenıeti men tiline degen qurmet belgisi retinde atap ótiletin mereke. Sonymen qatar, dál osy kúni qazaqtyń kórnekti aqyny, ádebıet zertteýshisi, ǵalym, túrkitanýshy, pýblısıs, pedagog, aýdarmashy, qoǵam qaıratkeri Ahmet Baıtursynulynyń týǵan kúni toılanady.
Ahmet atamyzdaı tulǵalar bir ǵasyrda bir týatyn asyl azamattar desem, qatelespeımin. Ol qazaq halqynyń erteńin oılap, tilimiz ben dilimizdiń joǵalmaýyn qalaǵan tulǵa. Qazaq halqy úshin atqarǵan eńbegi ushan-teńiz.
QazUÝ-dyń birinshi kýrs stýdenti jáne bolashaq til mamany retinde Ahmet Baıtursynuly atyndaǵy murajaıǵa jáne onyń eskertkishine gúl shoqtaryn qoıýǵa bardyq. Bul sapar óte áserli ári taǵylymdy boldy. Qazaqstan tarıhyna, táýelsizdik jolyndaǵy kúreskerlerdiń erlikterine jáne mádenı muraǵa qyzyǵatyn jandar úshin murajaıdyń mańyzy zor. Ahmet Baıtursynuly murajaıy kórnekti kóshbasshynyń ómiri men qyzmeti arqyly Otanymyzdyń tarıhymen tereńirek tanysýǵa múmkindik beredi. Onyń jeke zattary, óz qolymen qoldanǵan jolsandyǵy, samaýryny jáne qujattary erekshe nazar aýdartady.
Men úshin eń qyzyqtysy – Ahmet atamyzdyń jazýy boldy. Jazýy sonshalyqty kórkem, tipti kallıgrafıa ónerimen shuǵyldanǵandaı kórindi. Alash arysynyń barlyq isi minsizdeı kórinedi! Men úshin Ahmet atamyz – minsiz adam. Onyń aqyl-parasaty, elge adal qyzmet etýi, zıalylarmen birge eliniń bolashaǵy úshin kúresýi maqtanarlyq qasıetter.
Taǵy bir qyzyq derek – Ahmet Baıtursynulynyń otbasy 1933-1937 jyldary osy úıde turǵany aıtylady. 1988 jyly ol aqtalǵannan keıin, bul ǵımarat tarıh jáne sáýlet eskertkishi retinde tanylyp, 1993 jyly murajaı retinde ashyldy. Ahmet atamyzdyń eli úshin atqarǵan isteriniń biri – 1917 jylǵy revolúsıa kezinde qazaq halqynyń ulttyq múddesin qorǵap, Alash qaıratkerleriniń tobyn basqarǵany. Ol qazaqtyń rýhanı kóshbasshysy boldy.
Ahmet Baıtursynuly – ult bolashaǵyn oılaǵan dana, dara tulǵa. Ony umytpaý, ári qaraı dáripteý – bizdiń mindetimiz. Muny árdaıym este saqtaýymyz kerek.
Qýanyshqyzy Jadyra, ál-Farabı atyndaǵy QazUÝ, fılologıa fakúltetiniń1 kýrs stýdenti.
Symbat Igilikqyzy, PhD, ál-Farabı atyndaǵy QazUÝ-dyń aǵa oqytýshysy