Agrarlyq nesıe korporasıasy "Keń dala" baǵdarlamasy boıynsha aýyl sharýashylyǵy taýar óndirýshileri men agroónerkásiptik keshen sýbektilerin kóktemgi egis jáne egin jınaý jumystaryna qarjylandyrýdy jalǵastyrýda, dep habarlaıdy Almaty-akshamy.kz.
Buǵan deıin josparlanǵan 70 mıllıard teńgege qosymsha taǵy 70 mıllıard teńge bólinedi. Memleket basshysy Q.Toqaev 2022 jylǵy naýryzdaǵy "Jańa Qazaqstan: jańarý jáne jańǵyrý joly" atty Qazaqstan halqyna Joldaýynda atap ótkendeı, qazirgi tótenshe turaqsyz halyqaralyq jaǵdaıda elimizdiń azyq-túlik qaýipsizdigin qamtamasyz etýdiń mańyzy zor.
Egis naýqanynyń sapasy birinshi orynda tur, ondaǵy negizgi másele - eginshilerdi nesıelik qarajatpen qamtamasyz etý. Jyl saıyn Korporasıa qysqa merzimdi búdjettik nesıe tartý arqyly sharýalardy kóktemgi egis jáne egin jınaý jumystaryna 70 mlrd teńge kóleminde qarjylandyrady.
Aǵymdaǵy jyly aýyl sharýashylyǵy taýar óndirýshilerinen 90,7 mlrd teńgege 3 111 ótinim tústi, onyń ishinde 64,1 mlrd teńgege 2 myńnan astam qaryz alýshy qarjylandyryldy. 15 sáýirge deıin qarjylandyrýdyń qalǵan somasyna 500-den astam sharýa qojalyǵyn nesıelendirý josparlanýda.
Sonymen birge, aýyl sharýashylyǵy taýar óndirýshilerinen túsken ótinimder kólemin, aǵymdaǵy makroekonomıkalyq jaǵdaıdy, sharýalardyń egis naýqanyna jumsaıtyn shyǵyndarynyń ósýin eskere otyryp, Agrarlyq nesıe korporasıasy 70 mlrd teńge kóleminde qosymsha búdjet qarajatyn tartý boıynsha belsendi jumys júrgizýde. Osylaısha, 2022-2024 jyldarǵa arnalǵan respýblıkalyq búdjetke tıisti ózgerister men tolyqtyrýlar engizý qolǵa alyndy, qarajatty qabyldaýdyń boljaldy merzimi – aǵymdaǵy jyldyń mamyry.
Egistikterdi ýaqtyly júrgizýdiń kezek kúttirmeıtin qajettiligin eskere otyryp, Korporasıa búdjettik nesıe qarajatyn alǵanǵa deıin sharýalardy jeke jáne tartylǵan qarajat esebinen nesıelendirýdi bastady, keıin bul qarajat búdjettik nesıe qarajatymen almastyrylady.
Nesıeleý barlyq oblys ortalyqtarynda jáne respýblıkalyq mańyzy bar qalalarda ornalasqan 17 fılıal arqyly, sondaı-aq kredıttik seriktestikter, ekinshi deńgeıdegi bankter men mıkroqarjy uıymdaryn qarjylandyrý arqyly júzege asyrylady.