QR Ulttyq banki 2022 jylǵy naýryzdaǵy ınflásıalyq ahýal boıynsha saýalnamanyń nátıjesin jarıalady, dep habarlaıdy Almaty-akshamy.kz.
«Inflásıanyń sandyq baǵalaýy 2022 jylǵy naýryzda aldaǵy bir jylǵa 11,4% qurady. Aldaǵy 12 aıda baǵanyń aǵymdaǵy ósý qarqynynyń jedeldeýi nemese saqtalýy bolatynyn respondentterdiń 63 paıyzy aıtqan. Aldaǵy bir jylda baǵanyń ósýi bolady dep paıymdaǵan respondentter muny negizinen aıyrbas baǵamynyń ózgerýimen, azyq-túlik baǵasynyń qymbattaýymen jáne syrtqy oqıǵalarmen baılanystyrady», - delingen Ulttyq banktiń málimetinde.
Sonymen birge, respondentterdiń 51% ótken aıda baǵanyń ózgerissiz nemese qalypty ósýin atap ótti. Ótken aıda baǵanyń ósýin atap ótken respondentterdiń kópshiligi azyq-túlik ónimderin tańdady, olardyń úlesi 86 paıyzdy qurady.
«Azyq-túlik qurylymynda respondentterdiń úlesiniń ósýi nan-toqash jáne et ónimderi, ósimdik maıy men jumyrtqadan basqa barlyq pozısıalar boıynsha baıqaldy. Respondentter úlesiniń artýy qant, sút ónimderi, irimshik jáne shujyqtar, alkogólsiz sýsyndar, shaı jáne kofe sıaqty taýarlar boıynsha kórindi», - dep atalyp ótken UB habarlamasynda.
2022 jylǵy naýryzda jınaqtary bar halyqtyń úlesi 21 paıyzdy qurady. Respondentterdiń kópshiligi jınaqtaýdy qalyptastyrý úshin qazirgi kezeńdi beıtarap baǵalap otyr (jaqsy da, jaman da emes) – 39%. Jınaqtary bar respondentterde jalpy alǵanda sońǵy jyly jınaqtyń ózgermeıtindigi jáne tómendegeni (tıisinshe 35% jáne 32%) atap ótildi.
Ulttyq bank málimetine qaraǵanda, saýalnamaǵa qatysqandardyń negizgi bóligi ótken 12 aıda jeke materıaldyq jaǵdaıyn ózgerissiz dep aıtsa (respondentterdiń 53%), respondentterdiń 36% teris baǵa berdi.
Eldiń qysqa merzimdi jáne uzaq merzimdi damýyna qatysty optımızm tómendedi. Eldiń damý perspektıvalaryn bir jylǵa jáne 5 jylǵa oń baǵalaıtyn respondentterdiń úlesi tıisinshe 45% jáne 44% (aqpanda – 52 jáne 50%) quraıdy.
Respondentterdiń 28% aldaǵy bir jylda jeke qarjylyq jaǵdaıynyń jaqsaratynyn (aqpanda – 39%) alǵa tartsa, al 27 paıyzy nasharlaıdy dep paıymdaıdy (13%).