Atom elektr stansıalarynyń qaýipsizdik jáne qorshaǵan ortaǵa áseri týraly suraqtarǵa baılanysty Qazaqstan Respýblıkasy Ulttyq ıadrolyq ortalyǵy dırektorynyń orynbasary Erbolat Qoıanbaev zamanaýı AES reaktorlarynyń eki kontýrly salqyndatý júıesimen jabdyqtalǵanyn atap ótti.
"Eki kontýr gıdravlıkalyq turǵydan bir-birinen oqshaýlanǵan jáne tek jylý almastyrǵysh arqyly baılanysqan. Bul proses turaqty baqylaýda bolady. Odan bólek, kondensatordy salqyndatý úshin qoldanylatyn sý tikeleı kólden emes, arnaıy prýdtan alynady, ıaǵnı qorshaǵan ortaǵa áser etý múmkindigi barynsha azaıtylady," – dedi Qoıanbaev.
Onyń aıtýynsha, eki blokty AES jyl saıyn dástúrli gradırenderdi paıdalanǵanda shamamen 0,063 mıllıard tekshe metr sý qajet etedi. Bul kólemdi Qazaqstannyń iri ózenderi men sý qoımalary ońaı qamtamasyz ete alady. Mysaly, Balqash kóliniń kólemi 108 mıllıard tekshe metrdi quraıdy, al AES-tiń jyldyq sý qajettiligi İle ózeniniń jyldyq normasynyń 1%-yn quraıdy.
"Sonymen qatar, keıbir jobalarda dástúrli gradırenderdiń ornyna sý shyǵynyn talap etpeıtin qurǵaq gradırender qoldanylady. Bul sheshim sý resýrstaryn tıimdi paıdalanýǵa múmkindik beredi," – dep qosty Erbolat Qoıanbaev.
Bul málimdeme AES salý týraly kópshilikti mazalaǵan ekologıalyq qaýipterdi seıiltýge baǵyttalǵan jáne stansıanyń qorshaǵan ortaǵa áseri eń tómengi deńgeıde bolatynyn kórsetedi. Qazaqstannyń turaqty energetıka salasyna baǵyttalǵan qadamy uzaq merzimdi perspektıvada ekologıa men ekonomıkaǵa oń áserin tıgizbek.