Qaraǵandy oblystyq máslıhatynyń depýtaty jáne «Baıtaq» partıasynyń Qaraǵandy oblystyq fılıalynyń tóraǵasy Seıfýl-Málik Qazıtov Qazaqstanda AES salý jobasyn qoldaıtynyn málimdedi, dep habarlaıdy aqshamnews.kz.
«Atom energetıkasy – eldiń ekonomıkalyq damýy men ekologıalyq turaqtylyǵyna septigin tıgizetin mańyzdy faktor. AES taza energıa kózi retinde energetıkalyq qaýipsizdikti qamtamasyz etip qana qoımaı, ekonomıkanyń túrli sektorlaryna jaǵymdy áserin tıgizedi», – dedi Qazıtov.
Prezıdent Qasym-Jomart Toqaev óziniń Joldaýynda AES salý qajettiligin atap ótip, bul máseleni jalpyulttyq referendým arqyly sheshýdi usynǵan bolatyn. Qazıtov Prezıdenttiń bul bastamasyn qoldaıtynyn jáne atom energetıkasyn damytý el úshin mańyzdy strategıalyq sheshim ekenin atap ótti.
«AES salý – eldiń turaqty damýyna jáne ekologıalyq taza energıany óndirýge múmkindik beretin jobalardyń biri. Bul joba uzaq merzimdi perspektıvada Qazaqstannyń ekonomıkasy men halyqtyń ál-aýqatyna jaǵymdy áser etedi», – dedi ol.
Sondaı-aq, depýtat qazirgi ýaqytta atom energetıkasy salasynda jańa býyn reaktorlary sıaqty ınovasıalyq tehnologıalar belsendi túrde damyp kele jatqanyn jáne bul baǵytta Qazaqstannyń da aıtarlyqtaı áleýeti bar ekenin aıtty.
«Elimiz ýran qory boıynsha aldyńǵy qatarly memleketterdiń biri retinde, atom energetıkasynyń damýyna úlken úles qosa alady. Sondyqtan bul jobany qoldaý – bizdiń keleshek urpaqtyń turaqty damýyn qamtamasyz etýdiń mańyzdy qadamy», – dedi Seıfýl-Málik Qazıtov.