Kúni keshe ǵana Prezıdentimiz Joldaýynda naqty referendýmnyń kúnin belgilep berdi. Árıne, halyq óz tańdaýyn jasaı jatar. Biraq bir nárse anyq: ońtústik aımaqtarda energıa tapshylyǵy óte ózekti másele.
AES salý arqyly bul tapshylyqty joıýdyń naqty sheshimi qolymyzda tur. Úlken aýylynda 31 kópqabatty turǵyn úı bar. Qazir olardyń 22-sinde ǵana adamdar turyp jatyr, qalǵan úıler bos tur.
Kóptegen ǵımarattar kezinde jekemenshikke ótip ketken. Aýylda mektep pen shaǵyn ortalyqtan basqa áleýmettik nysandar joq. Onda 300-ge jýyq oqýshy bilim alady. Aýyldyq ákimdik qyzmetkerleri kópqabatty úılerdiń birinde ornalasqan 4 bólmeli páterde jumys isteýge májbúr.
Mádenıet úıi meshitke aınalǵandyqtan, mádenı is-sharalar men jınalystar Úlken orta mektebiniń májilis zalynda ótedi. Aýylda aýrýhana joq, turǵyndar dárigerlik kómek alý úshin Uzynaǵashqa, Qonaevqa nemese Almatyǵa barýǵa májbúr, bul úshin 350-400 shaqyrymdaı jol júrýge týra keledi.
Aýyldaǵy eki balabaqsha ǵımaraty jekeniń qolynda. AES salynady degen áńgime shyqqaly beri Úlkende jekemenshikke ótken ǵımarattar men páterlerdiń baǵasy sharyqtap ósip jatyr.
Jergilikti turǵyndar AES salynýy arqyly shalǵaı aýyldaǵy áleýmettik túıtkilder óz sheshimin tabady degen úlken úmitte.