Májilis Spıkeri, «AMANAT» partıasynyń Tóraǵasy Erlan Qoshanov atom elektr stansıasynyń ekonomıkanyń, ónerkásiptiń, bilimniń jáne ǵylymnyń damýyna tyń serpin beretin asa mańyzdy joba ekenin erekshe atap ótti. Onyń aıtýynsha, AES túrli táýekelderdiń aldyn alyp, elimizdi qýatty energetıkalyq bazasy bar progresıvti memleketterdiń qataryna qosýǵa yqpal etedi.
«AES salý – bir kúnniń máselesi emes. Jobany iske asyrý on jyldy, tipti odan da kóp ýaqytty alýy múmkin. Sizderdiń barlyǵyńyz da ekonomıkasy damyǵan, bolashaǵy zor, qýatty jáne táýelsiz Qazaqstanda ómir súrgińiz keletini sózsiz. Prezıdentimiz Qasym-Jomart Toqaevtyń da maqsaty – osy. Qazirgi qolǵa alynyp jatqan barlyq ister, eń aldymen, sizder úshin jasalyp jatyr. Endeshe, batyl sheshim qabyldaıtyn ýaqyt keldi. Al batyl sheshimdi qabyldaıtyn – jastar! Olaı bolsa, aldaǵy referendýmda AES salýǵa qoldaý bildirip, óz bolashaqtaryńyz úshin durys tańdaý jasaýlaryńyz qajet», – dedi Erlan Qoshanov jastarǵa arnaǵan sózinde.
Áńgimelesý barysynda Halyqtyq shtab músheleri AES qurylysynyń jastarǵa mol múmkindik beretinin atap ótti. Atap aıtqanda, laıyqty jalaqysy bar onmyńdaǵan jańa joǵary bilikti jumys oryndary ashylady. Qazaqstandaǵy joǵary oqý oryndarynyń túlekteri AES qurylysyna qatysýǵa jáne otandyq atom ındýstrıasynda qyzmet etýge barlyq múmkindikke ıe bolady.
Bolashaqta atom energetıkasyn damytýdyń memlekettik baǵdarlamasy ázirlenip, onda AES qajettiligine qaraı arnaıy kadr daıarlaýǵa erekshe kóńil bólinedi.