AES salýdy qoldaý jónindegi Halyqtyq shtabtyń óńirlerde halyqpen kezdesýi jalǵasýda. Shymkent qalasynda Shtab músheleri atom elektr stansıasynyń artyqshylyǵy týraly áńgimelesti.
Qala jastary atynan energetıka jáne dástúrli emes energetıkalyq júıeler kafedrasynyń PhD doktory Nursultan Faız, jas ǵalym Isabek Ázimhan, jastar ortalyǵynyń dırektory Aqan Besbaev, Stýdenttik parlamenttiń tóraǵasy Sabına Saǵyntaı AES salýdy qoldaý boıynsha óz oı-pikirlerin bildirdi.
Olar Qazaqstannyń jahandyq progresten tys qalmaýy qajet ekenin atap ótip, AES salýdyń mańyzdylyǵyna nazar aýdardy. AES tek energıa kózi bolýmen shektelmeı, elimizdegi ǵylym men tehnologıanyń damýyna serpin beretin iri joba bolatynyna senim bildirdi. Atom elektr stansıasynyń qurylysy men jumys isteýi jastarǵa úlken múmkindikter týdyratynyn, sondaı-aq jańa jumys oryndary men ǵylymı zertteýlerdiń keńeıýine jol ashatynyn erekshe atap ótti.
Nursultan Faız óz sózinde: «Qazaqstannyń energetıkalyq qaýipsizdigi men turaqtylyǵy úshin bizge AES sekildi iri jobalar qajet. Bul joba tek energıamen qamtamasyz etýmen shektelmeıdi, sonymen qatar elimizdiń ǵylymı áleýetin arttyrady, jańartylǵan tehnologıalardy engizýge múmkindik beredi. Jastarǵa bul jobada úlken ról beriledi, óıtkeni olar bolashaqtyń mamandary, AES syndy joǵary tehnologıalyq nysandardy basqaratyn kadrlar bolady», – dep atap ótti.
Isabek Ázimhan: «Atom energetıkasy ǵylymnyń ozyq baǵyttarynyń biri bolyp tabylady. AES salý elimizge álemdik deńgeıde jańa tehnologıalar men ǵylymı zertteýler júrgizýge múmkindik beredi. Jastardyń bul salada óz úlesin qosýy óte mańyzdy. AES – bul jańa deńgeıdegi ǵylym men tehnıkanyń toǵysýy, jáne biz, jastar, osy prosestiń ortasynda bolýymyz kerek», – dedi.
Aqan Besbaev AES-tyń jastarǵa beretin múmkindikterine toqtalyp: «AES salý – bul elimizdiń bolashaǵyna jasalǵan ınvestısıa. Jańa jumys oryndary, joǵary jalaqy jáne halyqaralyq deńgeıdegi tájirıbe – bul jastardyń bolashaǵy úshin óte mańyzdy. Bizdiń elde osyndaı iri jobalardy júzege asyrý arqyly biz jastardyń bolashaǵyna úlken múmkindik ashamyz», – dep oıyn jetkizdi.
Sabına Saǵyntaı: «Bizder, stýdentter, Qazaqstannyń bolashaǵynyń jarqyn bolýyna senemiz. AES tek energıa berip qana qoımaıdy, sonymen qatar ǵylym men tehnologıany damytýdyń katalızatory bolmaq. Osy sebepti, biz aldaǵy referendýmda bul jobany qoldaımyz jáne AES-tyń elimiz úshin strategıalyq mańyzǵa ıe ekendigine senimdimiz», – dedi.
Jalpy, jastar AES salý arqyly elimizdiń energetıkalyq táýelsizdigine qol jetkizip, ǵylym men tehnologıanyń jańa deńgeıine kóterilýine múmkindik beretinin atap ótip, bul jobany belsendi túrde qoldady.