Almaty qalasynyń Alataý aýdanyndaǵy Oqýshylardyń ınovasıalyq shyǵarmashylyq ortalyǵynda Prezıdent keńesshisi Málik Otarbaev Almaty bilim basqarmasy men pedagogtar qaýymymen mańyzdy kezdesý ótkizdi. Kezdesý barysynda Memleket basshysynyń joldaýynda aıtylǵan bilim berý jáne mamandar daıarlaý máselelerimen qatar, atom elektr stansıasyn salý boıynsha referendýmǵa erekshe nazar aýdaryldy.
Málik Otarbaev aldaǵy referendýmnyń – eldiń demokratıalyq damý jolyndaǵy mańyzdy qadam ekenin basa aıtty. Ol árbir azamattyń daýysy úlken mánge ıe bolyp, ortaq nátıjege tikeleı áser etetinin atap ótti. Bul referendým – shynaıy demokratıanyń aıqyn kórinisi ekenin atap ótti.
– Atom elektr stansıalary álemniń kóptegen elderinde bar, jáne olardyń kópshiliginde bul máselege qatysty referendýmdar ótkizilmegen. Bul atom energıasyn paıdalaný qatań standarttar men qaýipsizdik sharalarymen retteletin tájirıbe ekenin kórsetedi. Qazaqstan da osy qaýipsizdik talaptaryn saqtaı otyryp, damýdyń jańa kezeńine aıaq basyp otyr. Alaıda, menińshe, osyndaı mańyzdy máseleler boıynsha referendým ótkizý – qajettilik. Halyqtyń pikirin bilý jáne ony eskerý – demokratıalyq memleket úshin óte mańyzdy, – dedi Prezıdent keńesshisi Málik Otarbaev.
Sonymen qatar, ol atom energıasyn paıdalaný máselesinde qaýipsizdik sharalarynyń asa mańyzdy ekenin eske saldy. Qazirgi zamanaýı tehnologıalar bul salada úlken jetistikterge qol jetkizgenin, al halyqaralyq tájirıbe qatań standarttar negizinde júzege asyrylyp jatqanyn atap ótti.
Kezdesýde Málik Otarbaev atom elektr stansıasyn salýdyń el ekonomıkasyna, ǵylym men bilimge berer múmkindikterin de tilge tıek etti. AES qurylysy tek energetıkalyq turaqtylyqty qamtamasyz etip qana qoımaı, jańa jumys oryndaryn ashyp, ǵylymı-zertteý salalarynyń damýyna serpin beretinine toqtaldy.