Almaty qalasynyń Alataý aýdanyndaǵy Oqýshylardyń ınovasıalyq shyǵarmashylyq ortalyǵynda Prezıdent keńesshisi Málik Otarbaev Almaty bilim basqarmasy men pedagogtar qaýymymen kezdesý ótkizdi.
Kezdesý barysynda Memleket basshysynyń «Ádiletti Qazaqstan: zań jáne tártip, ekonomıkalyq ósý, qoǵamdyq optımızm» atty Joldaýy talqylandy. Joldaýda aıtylǵan bilim berý salasynyń odan ári damýy jáne mamandar daıarlaý máseleleri basty nazarda boldy.
– Bilim – qoǵam men ekonomıkanyń sátti damýynyń negizi. Sapaly bilimniń mańyzdylyǵyn asyra baǵalaý qıyn. Tehnologıalardyń jyldam ózgerýi men jahandaný jaǵdaıynda biz jas mamandarǵa tek teorıalyq bilim berip qana qoımaı, olardy kásibı ómirdiń shynaıy synaqtaryna daıyndaýymyz qajet. Jumys naryǵyna kirgen jastar ózimen birge jańa ıdeıalar men ınovasıalyq tásilderdi ákeledi, sondyqtan olardyń talanttaryn damytý jáne júzege asyrý úshin jaǵdaı jasaý mańyzdy. Alynǵan bilimdi is júzinde qoldaný, synı jáne shyǵarmashylyq oılaý qabiletterin damytý – zamanaýı bilimniń ajyramas bóligi, – dep atap ótti Málik Otarbaev.
Sondaı-aq, kitap oqýdyń mańyzdylyǵy men onyń bilim berý prosesindegi negizgi ról atqaratyny atap ótildi. Bul tek jınaqtalǵan tájirıbeni jetkizip qana qoımaı, álemdi tereń túsinýge jáne taldaý qabiletin damytýǵa múmkindik beredi. Sonymen qatar, baspasózdi damytý qajettiligi de aıtyldy, sebebi baspa basylymdary aqparattyń túrli kózderine keń qoljetimdilik berip, oqıǵalardy jaqsy túsinýge yqpal etedi.
