Halyqtyq shtab músheleri Jambyl oblysynda jergilikti temirjol qyzmetkerlerimen de kezdesti. Olar Memleket basshysy óz Joldaýynda kólik-logıstıka salasyn damytýǵa erekshe nazar aýdarǵanyn eske saldy, dep habarlaıdy aqshamnews.kz
Temirjol salasyna keshendi reformalar qajet: jańa temir joldar salý, poıyzdar men vagondar satyp alý, sıfrlandyrýdy engizý jáne basqa da máselelerdi sheshý kerek.
Temirjol jelisin elektr energıasymen qamtýdyń tómen deńgeıi qazirgi ýaqytta ótkizý qabiletiniń shekteýli bolýyna basty sebepterdiń biri bolyp otyr. Bul jolaýshylar men júk tasymalynyń jyldamdyǵyna da keri áser etedi.
Shý-Almaty ýchaskesinde elektr energıasy jıi úziledi. Tranzıttik áleýeti joǵary memleketimiz úshin bul – qomaqty paıdadan qaǵylý degen sóz. Buǵan jol berýge bolmaıdy. Bul máseleni jedel sheshý qajet. AES qurylysy osy túıtkilderdiń sheshimin taýyp, otandyq temirjoldyń senimdi jáne qoljetimdi tarıftermen elektr energıasyn qamtýǵa degen qajettiligin qanaǵattandyrady.
Shtab músheleri óńirdiń kún jáne jel elektr stansıalary boıynsha elde jetekshi orynǵa ıe bolǵanyna qaramastan, olardyń turaqty qýat bere almaıtynyn atap ótti. AES qaýipsizdigi týraly aıta otyryp, Parlament ıadrolyq qaýipsizdik jáne qorshaǵan ortany qorǵaý salasyna qatysty jeke zań qabyldaıtyny erekshe atalyp ótti. Bul qujat AES-ty jobalaý, salý jáne paıdalaný kezinde qatań qaýipsizdik standarttaryn qamtıdy.
Osy kúni AES salýdy qoldaý jónindegi Halyqtyq shtab músheleri Merki aýylynyń turǵyndarymen – qarjylyq saýattylyqty arttyrýǵa arnalǵan «Qaryzsyz qoǵam» jáne «Aýyl amanaty» jobalarynyń qatysýshylarymen kezdesti. İs-shara «Agrosaýat» oqý ortalyǵynyń alańynda ótti. Bul ortalyqta eginshilik, qus jáne mal sharýashylyǵynyń negizderi tegin oqytylady.
Baǵdarlamalarǵa qatysýshy aýyl turǵyndary bıznes ashý, jylyjaı salý, mal satyp alý jáne sharýa qojalyǵyn damytý úshin jeńildetilgen nesıe alýda. Alaıda, senimdi elektr energıasy bolmasa, bul jobalardy turaqty túrde júzege asyrý múmkin emes. Osyǵan baılanysty aýyl turǵyndary AES qurylysyna qoldaý bildirip, bul joba agroónerkásiptik keshendi damytýda strategıalyq mańyzdy ról atqarady dep esepteıdi.
Jalpy, Halyqtyq shtabtyń barlyq kezdesýlerinde óńir turǵyndary AES salýǵa úlken qyzyǵýshylyq tanytyp, aldaǵy referendýmǵa qatysýǵa daıyn ekendikterin jetkizdi.