AES salýdy qoldaý jónindegi Halyqtyq shtab Talǵar aýdanyndaǵy «NUR KAGAZY» JSHS-niń ujymymen kezdesý ótkizdi. Jıyn barysynda atom energetıkasynyń Qazaqstan ekonomıkasy men energetıkalyq qaýipsizdigine yqpaly talqylandy, dep habarlaıdy aqshamnews.kz
Halyqtyq shtabtyń múshesi Lázzat Turlashov óz sózinde AES-tiń elimiz úshin mańyzdy strategıalyq joba ekenin atap ótti. Ol atom energetıkasynyń eldi energetıkalyq táýelsizdikke jetkizetin basty qadam ekenine basa nazar aýdardy.
«Biz qazir jańa energetıkalyq kezeńniń aldynda turmyz. AES – tek senimdi elektr kózi ǵana emes, elimizdiń ekonomıkalyq damýynyń negizgi qozǵaýshy kúshine aınalady. Qazirgi tańda elimizdegi elektr energıasynyń 70%-yn kómir stansıalarynan alyp otyrmyz, biraq bul tásildiń ekologıalyq turǵydan tıimsiz ekeni belgili. AES salý – osy máselelerdi sheshýdiń ońtaıly joly», – dedi Turlashov.
Óndiris qyzmetkeri Sábıt Tastemirov te óz pikirin bildirip, elektr qýatynyń jetispeýshiligi óndiris oryndaryna keri áserin tıgizetinin aıtty. Ol AES salý arqyly elimizde turaqty energıamen qamtamasyz etilip, artyq qýatty eksporttaýǵa múmkindik týatynyn atap ótti.
Kezdesýge qatysýshylar AES jobasynyń ekonomıkalyq jáne ekologıalyq tıimdiligin talqylap, el bolashaǵy úshin bul jobany qoldaýǵa daıyn ekenderin jetkizdi.