Dúnıejúzilik densaýlyq saqtaý uıymy (DDU) Iordanıany álemde alapes aýrýynan qutylǵan alǵashqy el ekenin resmı túrde jarıalady.
Bul jaıynda islam.kz portaly newsonair.gov.in aqparat kózine silteme jasaı otyryp málim etedi, dep habarlaıdy aqshamnews.kz.
«Dúnıejúzilik densaýlyq saqtaý uıymy (DDSU) Iordanıa koroldigin álemdegi resmı túrde alapesten taza el bolǵanymen quttyqtaıdy. Bul mańyzdy jetistik densaýlyq saqtaý salasyndaǵy jahandyq kúsh-jigerdiń jańa dáýirge aıaq basqanyn bildiredi», dep málimdedi atalmysh uıym. Málimdemede Iordanıanyń jıyrma jyldan astam ýaqyt boıy alapes aýrýyna eshkimniń shaldyqpaǵany aıtylǵan. Alapes – Mycobacterium leprae bakterıasy týdyratyn sozylmaly juqpaly aýrý. Terige, perıferıalyq júıke júıesine, joǵarǵy tynys joldarynyń shyryshty qabattaryna jáne kórý qabiletine keri áser etedi. Alapes aýrýynan erte emdelgen naýqas dertinen qulan taza jazylady.