Almatydaǵy Iadrolyq fızıka ınstıtýtynyń qatty dene radıasıalyq fızıka bóliminiń bastyǵy Sergeı Kıslısın atom energetıkasynyń Qazaqstandaǵy tehnologıalyq progres pen ınovasıalardy damytýǵa qalaı yqpal etetini týraly aıtyp berdi, dep habarlaıdy aqshamnews.kz
– Atom elektr stansıalary (AES) únemi jańartylyp, olardyń qaýipsizdigi men ekonomıkalyq tıimdiligin arttyrý maqsatynda jetildiriledi. Bul mıkroelektronıka, baǵdarlamalyq qamtamasyz etýdi ázirleý, konstrýksıalyq materıaldar men ıadrolyq otyn salalaryn damytýdy yntalandyrady. Osy baǵyttardyń barlyǵy Qazaqstanda bar jáne olar atom elektr stansıasynyń zamanǵa saı jumys isteýin qamtamasyz etýge mindetti, – dedi Sergeı Kıslısın.
Sonymen qatar, mamannyń aıtýynsha, atom energetıkasy tek energıa óndirýmen shektelip qoımaıdy. Bul salanyń damýy arqyly Qazaqstandaǵy ǵylym men ınovasıa salasyndaǵy zertteýler keńeıe túsedi. Mysaly, AES-tiń jumys isteýine qajetti jańa tehnologıalar men materıaldar óndirisi eldegi ónerkásiptiń damýyna serpin beredi. Sondaı-aq, atom energetıkasy medısına, aýyl sharýashylyǵy jáne basqa da ekonomıkalyq sektorlarda jańa tehnologıalardyń paıda bolýyna negiz bolady.
– AES Qazaqstannyń energetıkalyq táýelsizdigine yqpal etedi, bul eldiń turaqty damýynda mańyzdy ról atqarady. Budan bólek, atom energetıkasy arqyly Qazaqstan óziniń ǵylymı-tehnıkalyq áleýetin kúsheıtip, álemdik naryqta básekege qabiletti bola alady, – dep qosty Sergeı Kıslısın.
Osylaısha, AES-tiń qurylysy men jumys isteýi elimizdiń tek energetıka salasyna ǵana emes, jalpy ǵylym, tehnıka jáne óndiris salalaryna da úlken paıda ákeletinin atap ótýge bolady.